شریعہ پولیس ہم جنس افراد کو رہا کرے

سیکولر ملک انڈونیشیا میں آچے وہ واحد صوبہ ہے جہاں اسلامی شرعی قانون نافذ ہے اور جہاں ہم جنس پرستی قانوناﹰ جرم ہے۔ انڈونیشیا کی پارلیمان میں بھی ایسے قوانین پر بحث جاری ہے جن کے تحت شادی کے علاوہ جنسی تعلقات کو جرم قرار دیا جائے گا۔ انڈونیشیا  میں انسانی حقوق کے لیے کام کرنے والے کارکنان کا کہنا ہے کہ اس نئے قانون کے ذریعے ہم جنس پرستوں کو نشانہ بنایا جائے گا۔

مقامی انتظامیہ کا کہنا ہے کہ ہم جنس پرستی کے الزام میں چار افراد کو خود ساختہ طور پر جرائم پر نظر رکھنے والے افراد اور پولیس نے حراست میں لیا تھا۔ ان افراد پر جرم ثابت ہونے کی صورت میں انہیں ایک سو کوڑوں کی سزا سنائی جا سکتی ہے۔ آچے کے صوبائی دارالحکومت بندا آچے میں پولیس کے سربراہ مارزوکی کا کہنا تھا، ’’ہم ان افراد کے بارے میں تفتیشی عمل مکمل کر رہے ہیں جلد ہی انہیں استغاثہ کے حوالے کر دیا جائے گا۔‘‘

ہیومن رائٹس واچ کا کہنا ہے کہ کوڑوں کی سزا بین الاقوامی قوانین کے تحت تشدد کے زمرے میں آتی ہے۔ اس تنظیم میں ایل جی بی ٹی افراد کے ڈائریکٹر گرام ریڈ کا کہنا ہے، ’’صوبہ آچے کی انتظامیہ کو ان چار مشتبہ افراد کو جلد رہا کر دینا چاہیے اور خود ساختہ طور پر جرائم پر رکھنے والوں کے اقدامات سے عام لوگوں کو محفوظ رکھنے کو یقینی بنایا جائے جو معاشرے کے ایسے طبقات کو نشانہ بنتاتے ہیں جو خطرات کا شکار ہیں۔‘‘

آچے میں پولیس اور اس طرح کے افراد اکثر گھروں اور دفاتر پر چھاپے مار کر لوگوں کو ہم جنس پرست ہونے کے شبے پر گرفتار کر لیتے ہیں۔ اس سال کے آغاز میں اس صوبے کی پولیس نے بارہ ٹرانس جینڈر خواتین کو گرفتار کر لیا تھا اور انہیں زبردستی مردوں کا لباس پہننے پر مجبور کیا تھا۔ پولیس نے ان خواتین کے بال بھی مردوں کے انداز میں کاٹ دیے تھے۔

ب ج/ ا ا، روئٹرز