شام میں کیمیائی ہتھیاروں کی تلفی کا آغاز

اقوام متحدہ کے ماہرین کی اس ٹیم نے اندازوں کے مطابق درجنوں مختلف مقامات پر موجود ایک ہزار ٹن کے قریب خطرناک گیسوں سارین اور مسٹرڈ کے ذخیروں کے علاوہ دیگر ممنوعہ ہتھیاروں کو محفوظ انداز میں ضائع کرنا ہے۔ اس کے علاوہ ان ہتھیاروں سے متعلق تنصیبات کو بھی ختم کیا جائے گا۔

اقوام متحدہ اور دی ہیگ میں قائم کیمیائی ہتھیاروں کے انسداد کے ادارے OPCW کے ماہرین اس خصوصی مشن پر منگل یکم اکتوبر کو شامی دارالحکومت دمشق پہنچے تھے۔ اقوام متحدہ میں شام کے حوالے سے منظور کی جانے والی ایک قرار داد کے مطابق 2014ء کے وسط تک شامی کیمیائی ہتھیار کو ناکارہ بنانے کا عمل مکمل کیا جانا ہے۔

شام میں کیمیائی ہتھیاروں کی تلفی کے آپریشن کے آغاز پر شامی صدر بشار الاسد نے جرمنی کے اشپیگل میگزین کو انٹرویو دیتے ہوئے اس بات کا اعتراف کیا ہے کہ ان کی حکومت کی طرف سے ملک میں جاری خانہ جنگی کے حوالے سے بعض غلطیاں سر زد ہو ئی ہیں۔ تاہم انہوں نے ایک مرتبہ پھر اس بات کی تردید کی کہ شامی فورسز نے 21 اگست کو کیمیائی ہتھیاروں کا استعمال کیا تھا۔ اسی حملے کے تناظر میں شام کو اس کے کیمیائی ہتھیاروں کی تلفی کا پابند کیا گیا ہے۔

شام میں موجود اقوام متحدہ اور OPCW کے ماہرین کے مشترکہ مشن میں شریک ایک اہلکار نے اے ایف پی کو بتایا، ’’آج تلفی کے کام پہلا دن ہے جس میں میزائل وار ہیڈز، فضا سے گرائے جانے والے بموں اور گیسوں کو مکس کرنے والے متحرک اور فِکس یونٹس کو تباہ کیا جائے گا۔‘‘

اس مشن سے منسلک ذرائع کے مطابق، ’’فیز ون، جس میں شام نے اپنے ہتھیاروں کی تفصیلات فراہم کرنا تھیں، وہ ختم ہو رہی ہے اور اب ہم فیز ٹو میں داخل ہو رہے ہیں جس میں ان ہتھیاروں کی تصدیق، تلفی اور ناکارہ بنانے کا عمل مکمل کیا جائے گا۔‘‘

شامی حکومت نے عالمی برداری کو اقوام متحدہ کی قرار داد کے مطابق اپنی کیمیائی ہتھیاروں کی تلفی کے اس آپریشن میں اپنے بھرپور تعاون کا یقین دلا رکھا ہے۔ یہ قرار داد روس اور امریکا کے درمیان شامی کیمیائی ہتھیاروں کو عالمی برادری کی زیر نگرانی تلف کیے جانے کے حوالے سے ایک معاہدے کے بعد سلامتی کونسل نے منظور کی تھی۔

دمشق کے نواحی علاقے غوطہ میں 21 اگست کو ہونے والے کیمیائی حملے کے بعد امریکا کی طرف سے شام کے خلاف فوجی کارروائی کی دھمکی دی گئی تھی، تاہم روس اور امریکا کے درمیان معاہدے کے بعد اس حملے کے امکانات ختم ہو گئے تھے۔