سیو دی چلڈرن کے غیر ملکی ملازمین پاکستان چھوڑ دیں

سیو دی چلڈرن تنظیم کے مطابق اس کے پاکستان میں متعین  غیر ملکی ملازمین کو ملک چھوڑ دینے کے لیے دو ہفتے کی مہلت دی گئی ہے۔ اس حکومتی فیصلے کے حوالے سے حکومت پاکستان کی جانب سے کوئی واضح بیان سامنے نہیں آیا ہے۔ تنظیم کے ترجمان غلام قادر نے نیوز ایجنسی اے ایف پی کو بتایا کہ پاکستانی وزارت داخلہ کی جانب رواں ہفتے کے دوران غیر ملکی اہلکاروں کو کوئی واضح وجوہات کے بغیر ملک چھوڑ دینے کا حکم دیا گیا ہے۔ ترجمان کے مطابق کل چھ غیر ملکی اہلکار پاکستان میں موجود ہیں اور مقامی ملازمین کی تعداد دو ہزار کے قریب ہے۔

ترجمان غلام قادر کے مطابق وزارت داخلہ کے ساتھ گفتگو کے ذریعے غیر ملکی ملازمین کی واپس روانگی کے لیے مزید مہلت حاصل کر لی گئی ہے تا کہ وہ انتظامی اور پالیسی امور کو حتمی شکل دے سکیں۔ غلام قادر کے مطابق اس حکومتی فیصلے سے سیو دی چلڈرن اپنے جاری پراجیکٹس کو معطل نہیں کرے گی کیونکہ ان کے ساتھ ستر لاکھ بچوں اور خاندانوں کا مستقبل وابستہ ہے۔

نیوز ایجنسی اے ایف پی کی رپورٹس میں بتایا گیا ہے کہ بین الاقوامی غیر سرکاری تنظیم سیو دی چلڈرن کے بارے میں حکومتی فیصلہ خفیہ اداروں کی رپورٹس پر کیا گیا ہے۔ ان رپورٹس کے مطابق سیو دی چلڈرن کے غیر ملکی اہلکاروں نے ڈاکٹر شکیل آفریدی کو امریکی اہلکاروں سے متعارف کروایا گیا تھا۔ اسامہ بن لادن کی نشاندہی میں مدد دینے کے حوالے سے ڈاکٹر شکیل آفریدی 33 برس کی قید بھگت رہا ہے۔ سیو دی چلڈرن کے ترجمان نے ان الزامات کو بے بنیاد قرار دیتے ہوئے کہا کہ ادارہ اپنے مینڈیٹ سے ہٹ کر کوئی کام نہیں کر سکتا۔ غلام قادر کے مطابق ڈاکٹر شکیل آفریدی کے حوالے سے ان کا مؤقف شفاف ہے اور اس میں کوئی صداقت نہیں ہے۔

امریکی وزارت خارجہ کی جانب سے جاری ہونے والے بیان میں کہا گیا ہے کہ امریکا سیو دی چلڈرن کے پاکستان میں جاری پروگرام کو پوری طرح حمایت کرتا ہے۔ پاکستان میں امریکا کے نائب سفیر رچرڈ ہوگ لینڈ (Richard Hoagland) نےکہا کہ سیو دی چلڈرن کا اسامہ بن لادن کی رہائش گاہ کی تلاش کے ساتھ کوئی سروکار نہیں ہے۔ سوشل نیٹ ورکنگ سائٹ ٹویٹر پر ایک بیان میں ہوگ لینڈ کا کہنا ہے کہ ایبٹ آباد کے وقوعے کے ساتھ تنظیم کسی طور شریک نہیں تھی۔ امریکی نائب سفیر نے اس معاملے پر تاسف کا اظہار کیا ہے۔

غیر سرکاری تنظیم سیو دی چلڈرن کے عبوری نائب پیٹرک وینٹرل (Patrick Ventrell) کا کہنا ہے کہ  اس ساری صورت حال پر تشویش رکھتے ہوئے حکومت پاکستان کے ساتھ اس معاملے کو اٹھایا گیا ہے کہ پاکستان کے اندر سیو دی چلڈرن کے جاری پراجیکٹس کو معطل نہ کیا جائے۔ پیٹرک وینٹرل کا مزید کہنا ہے کہ آزاد غیر سرکاری تنظیمیں صحتمند جمہوری اقدار کو مضبوط بنانے میں فعال کردار ادا کرتی ہیں اور اس مناسبت سے حکومت پاکستان سے اپیل کی جاتی ہے کہ وہ ایسا ماحول پیدا کریں جس میں ایسی غیر سرکاری تنظیمیں مثبت انداز میں متحرک اور فعال رہیں۔

ah/ai (AFP)