’سکیورٹی اداروں کی توہین‘، پاکستانی صحافی کے خلاف مقدمہ

ایک مقامی ٹی وی سے وابستہ صحافی شاہزیب جیلانی کے خلاف مولوی اقبال حیدر ایڈوکیٹ نے ایف آئی اے کو درخواست دیتے ہوئے موقف اختیار کیا کہ 18 مارچ کے پروگرام میں شاہ زیب جیلانی نے ملک کے سیکورٹی اداروں کے لیے توہین آمیز زبان استعمال کی اور یہ تاثر دینے کی بھی کوشش کی گئی ہے کہ لوگوں کی جبری کمشدگیوں میں بھی سکیورٹی ادارے ملوث ہیں اور قانون نافذ کرنے والے اداروں پر سیاسی نظام میں مداخلت کا بھی الزام عائد کیا گیا ہے۔ ایف آئی اے نے درخواست پر کارروائی کرتے ہوئے شاہ زیب جیلانی کے خلاف مقدمہ درج کیا تاہم شاہ زیب نے اس حوالے سے عدالت سے رجوع کیا اور ایک لاکھ روپے زرضمانت کے بدلے انہیں سندھ ہائیکورٹ سے عبوری ضمانت قبل ازگرفتاری مل گئی۔

پاکستانی فوج کی نیو یارک ٹائمز پر شدید تنقید

فیس بُک پر آئی ایس آئی کی حمایت میں مہم

شاہ زیب جیلانی نے ڈی ڈبلیو سے گفتگو کرتے ہوئے بتایا کہ وہ کئی ملکی میڈیا ہاؤسز کے علاوہ برطانوی نشریاتی ادارے سے بھی وابستہ رہ چکے ہیں، ’’میں نے اپنے پروگرام میں ایسی کوئی بات نہیں کہ جس کا مولوی اقبال حیدر نے اپنی درخواست میں حوالہ دیا ہے، البتہ اقبال حیدر صاحب پر سابق چیف جسٹس آف پاکستان افتخار محمد چوہدری نے اپنے کورٹ میں داخلے پر پابندی عائد کی تھی جسے چیف جسٹس ثاقب نثار نے بھی برقرار رکھا۔‘‘

شاہ زیب جیلانی کے مطابق اقبال حیدر اسی طرح کے معاملات کے حوالے سے شہرت رکھتے ہیں۔ شاہ زیب جیلانی کے مطابق انہوں نے پروگرام کے لیے سابق وزیر اعظم محمد خان جونیجو کی خدمات کے حوالے سے ایک ڈاکیومینٹری تیار کی تھی۔ ان کا کہنا تھا، ’’محمد خان جونیجو کے بارے میں عام تاثر ہے کہ وہ جنرل ضیاالحق کے کٹھ پتلی وزیراعظم تھے لیکن اس کے باوجود بھی ملک کو جمہوری ڈگر پر لانے میں ان کا بڑا کردار ہے، جسے ہم بھلاچکے ہیں۔‘‘

جیلانی نے مزید کہا، ’’پاکستانیوں کی اکثریت میرے اس تبصرہ سے اتفاق کرے گی، میں نے کسی پر الزام نہیں لگایا صرف حقائق بیان کیے ہیں مگر مولوی اقبال حیدر نے الزام لگایا ہے کہ میں نے انٹیلی جنس ایجنسیوں کو بدنام کیا ہے اور ذومعنی الفاظ سے یہ کہنے کی کوشش کی ہے کہ ملک کا نظام درپردہ فوج چلا رہی ہے۔‘‘

شاہ زیب جیلانی کا کہنا تھا، ’’یہ بات کسی سے ڈھکی چھپی نہیں کہ بلوچستان اور خیبر پختونخوا سے ایک عرصے سے جبری گمشدگیاں ہو رہی ہیں مگر پھر لاہور اور اسلام آباد سے بھی ہونے لگی ہیں، جس سے یہ معاملہ مین اسٹریم میں آگیا ہے تو میں نے اسے صحافتی انداز میں کور کیا کہا کہ اگر ریاست کو کسی کے ساتھ شکایت ہے تو آپ قانون کے دائرے میں رہ کر ان کے خلاف کارروائی کریں۔ اس میں ناراضگی سمجھ سے بالا تر ہے۔‘‘

دوسری جانب شاہ زیب جیلانی پر مقدمہ دائر کرنے والے مولوی اقبال حیدر نے ڈوچے ویلے کو بتایا، ’’’’شاہ زیب نے دنیا ٹی وی کے پروگرام میں ملکی سلامتی سے متعلق اداروں کے خلاف ہرزہ سرائی کی اور جو زبان استعمال کی وہ اداروں کے شایان شان نہیں تھی۔‘‘

اقبال حیدر کے مطابق انہوں نے اس حوالے سے نہ صرف شاہ زیب جیلانی بلکہ دنیا ٹی وی پر بھی جرمانے اور پروگرام کی بندش کا مطالبہ کیا ہے جس پر چیرمین پیمرا نے ابھی کارروائی نہیں کی۔

سپریم کورٹ میں داخلے پر پابندی سے متعلق مولوی اقبال حیدر کا کہنا تھا، ’’انہوں نے سابق چیف جسٹس افتخار محمد چوہدری پر اعتراض کیا تھا کہ وہ سابق صدر پرویز مشرف کے خلاف مقدمہ کی سماعت نہیں کرسکتے، جس پر انہوں نے مجھ پر پابندی عائد کردی تھی۔‘‘

شاہ زیب جیلانی سے متعلق اس مقدمہ کی اگلی سماعت پیر 15 اپریل کو سندھ ہائی کورٹ میں ہوگی۔