سمندری طوفان کا خطرہ،  چین میں ’ریڈ الرٹ‘ جاری

اطلاعات کے مطابق تائیوان میں تیز ہواؤں کے ساتھ بارشوں کا سلسلہ شروع ہوگیا ہے۔ ٹائیفون سولہ کلومیٹر فی گھنٹے کی رفتار سے آگے بڑھ رہا ہے۔ طوفان کے پیش نظر تائیوان میں حکام نے اسکول اور دفاتر بند کر دیے ہیں جبکہ کئی سو اندرونی و بیرونی ملک پروازیں منسوخ کردی گئیں ہیں۔ 

توقع ہے طوفان کل ہفتے کی صبح چین کے صوبے زی جیانگ کی ساحلی پٹی سے ٹکرائے گا۔

 چین کے محکمہ موسمیات نے خبردار کیا ہے کہ ٹائی فون ’لیکیما‘ کے باعث زہجیانگ اور شنگھائی سمیت آس پاس کے دیگر صوبوں میں تیز بارشیں ہوں گی اور زور دار جھکڑ چلیں گے۔

چینی حکام نے سات صوبوں میں سرکاری اداروں کو ہنگامی بنیادوں پر احتیاطی تدابیر  اختیار کرنے کی ہدایات جاری کردی ہیں۔  ٹرینیں اور پروازیں معطل کر دی گئی ہیں جبکہ کشتیوں کو سمندری پانیوں سے واپس ساحل پر پہنچنے کے احکامات جاری کر دیے گئے ہیں۔ حکام نے سیاحتی جزیرے بیجی سے دو سو سیاحوں کو نکال کر محفوظ مقام پر منتقل کر دیا ہے۔

خدشہ ہے کہ طوفان کے باعث یانگزی دریا میں طغیانی آ سکتی ہے اور سیلاب کی وجہ کئی علاقے متاثر ہو سکتے ہیں۔