’سستا گوشت مت خریدیں‘

جرمن وزیر خوراک و زراعت یولیا کِلؤکنر نے آج جمعہ چھبیس جون کو ملکی گوشت کی صنعت سے وابستہ نمایاں افراد اور اہلکاروں کے ساتھ ایک ملاقات کی ہے۔ اس ملاقات کا بنیادی ایجنڈہ جرمنی میں لائیو اسٹاک کا مستقبل اور ضروریات ہیں۔

یہ میٹنگ اس لیے بھی اہم خیال کی گئی کہ حالیہ ہفتوں کے دوران کئی جرمن قصائی خانوں میں کورونا وائرس کی وبا پھوٹنے پر ہر خاص و عام میں تشویش کی لہر دوڑ چکی ہے۔ اس حوالے سے قصائی خانوں کے انتظامات اور ملازمین جن حالات میں کام کرتے ہیں، ان پر بھی انگلیاں اٹھائی جا رہی ہیں۔

اس میٹنگ میں یولیا کِلؤکنر کے ساتھ میٹ انڈسٹری سے جڑے معاملات مثلاً  ورکرز کے بنیادی مسائل اور ذبح کیے جانے والے جانوروں کی صحت اور حقوق پر فوکس کرنے کے ساتھ ساتھ جانوروں کی بہبود کے ٹیکس کو بھی زیر بحث لایا گیا۔

مزید پڑھیے: ’میں نے رات کے وقت ساتھیوں کی سسکیاں سُنیں‘

جرمن وزیر خوراک و زراعت کا کہنا ہے کہ یورپی ممالک میں سب سے سستا گوشت جرمنی میں دستیاب ہے۔ انہوں نے واضح کیا کہ ملک میں گوشت کوئی لگژری آئٹم نہیں ہے اور وہ امید کرتی ہیں کہ لوگوں کو سستے گوشت کو خریدنے سے اجتناب کرنا بھی ضروری ہے۔ جرمن وزیر نے ملکی عوام کو کم گوشت کھانے کی عادت اپنانے کی تلقین بھی کی۔

جرمن فیڈریشن برائے ٹریڈ یونین نے برلن حکومت کے ساتھ گوشت کی صنعت  سے وابستہ افراد کی ملاقات کا جہاں خیر مقدم کیا وہاں تحفظات کا بھی اظہار کیا ہے۔ یونین نے اس ملاقات کو کوئی بڑی پیش رفت قرار دینے سے انکار کرتے ہوئے واضح کیا کہ آخری وقت پر ہونے والی یہ بات چیت کسی بڑی تبدیلی کا آئینہ دار نہیں۔ ٹریڈ یونین سے منسلک آنیا پیل نے جرمن اخبار نوئے اوسنابروک سائٹُنگ کے ساتھ بات کرتے ہوئے کہا کہ پہلے بھی ایسی ملاقاتوں کے بارے میں بہت سنا گیا لیکن کوئی نتیجہ سامنے نہیں آیا تھا۔

یہ بھی پڑھیے: کیا بار بی کیو کی عادت آپ کی جان بھی لے سکتی ہے؟

یہ امر اہم ہے کہ حالیہ ہفتوں میں جرمن قصائی خانوں پر اندرونی ناقص انتظامات اور ورکرز کی حالتِ زار کے تناظر میں شدید تنقید کی جا رہی ہے۔ گزشتہ ایک دو ہفتوں کے دوران ساٹھ ہزار آبادی کے دو شہروں میں قائم دو بُوچر ہاؤسز کے بے شمار ورکرز میں کووڈ انیس کی بیماری پھیلنے کے واقعات سے سارے ملک میں تشویش کی لہر دوڑ گئی تھی۔ جرمن مِیٹ انڈسٹری کی سرخیل کمپنی ٹوئنِیز کے ایک ہزار ورکرز میں کورونا وائرس کی تشخیص کی گئی تھی۔

ع ح، ع آ (روئٹرز، اے ایف پی)