زیمبیا کے صدر مائیکل ساٹا کی رحلت

لندن کے کنگ ایڈورڈ ہفتم ہسپتال میں زیر اعلاج مائیکل ساٹا کے فوت ہونے کی زیمبیا کی حکومت نے تصدیق کر دی ہے۔ ستتر برس کے علیل صدر کو کون سی بیماری لاحق تھی، اِس بارے کچھ نہیں بتایا گیا۔ وہ انیس اکتوبر کو علاج کی غرض سے لندن کے لیے روانہ ہوئے تھے۔ سن 2011 میں صدر بننے والے مائیکل ساٹا گزشتہ کچھ عرصے سے علیل چلے آ رہے تھے۔ علالت کا یہ سلسلہ جون میں شروع ہوا تھا اور وہ پہلے علاج کے لیے اسرائیل بھی گئے تھے۔ زیمبیا کے دارالحکومت لُوساکا میں کیبنٹ سیکرٹری رولینڈ مسِیسکا نے ملکی ٹیلی وژن پر اپنے صدر کی رحلت کا اعلان کرتے ہوئے بتایا کہ لندن میں زیر علاج ملکی صدر کی رحلت ہو گئی ہے اور ساری قوم اِس پر افسردہ ہے۔

اپنی علالت کی وجہ سے صدر مائیکل ساٹا رواں برس اقوام متحدہ کی جنرل اسمبلی کے اجلاس میں مقررہ روز تقریر نہیں کر سکے تھے۔ وہ نیویارک ضرور پہنچے لیکن وہیں اُن کی علالت میں شدت پیدا ہو گئی تھی اور جنرل اسمبلی میں اپنی تقریر نہیں کر سکے۔ لندن روانگی سے ایک دو روز قبل انہوں نے ملکی پارلیمنٹ کی نئی عمارت کے افتتاح کے موقع پر مزاحاً کہا تھا کہ وہ ابھی مرے نہیں کہ اِس تقریب میں شریک نہ ہوں۔ وہ زبان کے انتہائی تُرش اور کڑوے تھے اور اسی بنا پر ان کی عُرفیت ’کنگ کوبرا‘ بن گئی تھی۔

مائیکل ساٹا کا تعلق ایک غریب گھرانے سے تھا اور جب وہ پیدا ہوئے تو اُن کا ملک انگلش نوآبادیاتی تھا۔ انہوں نے سیاسی زندگی کا آغاز ایک ٹریڈ یونین ورکر کے طور پر کیا۔ عملی زندگی میں وہ پولیس اہلکار، کار جوڑنے کے کارخانے میں بھی ملازم رہے۔ وہ لندن کے وکٹوریہ ریلوے اسٹیشن پر صفائی کرنے والوں میں بھی شامل تھے۔ بطور صدر اُن کی پالیسیوں میں مطلق العنانیت کا پہلُو نمایاں تھا۔ وہ سن 2008 میں معمولی فرق سے صدارتی الیکشن ہار گئے تھے لیکن سن 2001 میں انہوں نے اُس وقت کے صدر رُوپیا بانڈے کو شکست دی تھی۔

ساٹا کی رحلت سے خالی ہو جانے والی مسندِ صدارت کے لیے امکاناً وزیر دفاع ایڈگر لُونگو کو بٹھایا جا سکتا ہے۔ لُونگو رحلت پا جانے والے صدر کی پیٹریاٹک فرنٹ پارٹی کے سیکرٹری جنرل بھی ہیں اور حال ہی میں زیمبیا کی آزادی کی پچاسویں سالگرہ کی تقریبات کی قیادت بھی انہوں نے کی تھی۔ موجودہ سفید فام نائب صدر گئی اسکاٹ آج کل عبوری صدر ہیں لیکن امکاناٰ وہ مستقلاً صدر نہیں بنائے جا سکتے کیونکہ اُن کے والدین کی پیدائش کا مقام زیمبیا نہیں ہے۔ اگر گئی اسکاٹ صدر بنے تو وہ ایف ڈبلیُو ڈی کلارک کے بعد کسی افریقی ملک کے سفید فام صدر ہوں گے۔