زیادہ درآمدات اور کم محصولات، چینی صدر کا وعدہ

شنگھائی میں پیر کے روز بین الاقوامی چائنا انٹرنیشنل امپورٹ ایکسپو سے خطاب میں چینی صدر شی جن پنگ نے کہا کہ چین اپنی درآمدی منڈی کو غیر ملکی کمپنیوں کے لیے زیادہ کھولے گا جب کہ ان کمپنیوں کے مفادات کے تحفظ کے لیے بھی اقدامات کیے جائیں گے۔

’تجارتی جنگ کے اثرات‘ آئی ایم ایف کی پیشن گوئیوں میں تبدیلی

امریکا اور چین کے مابین تجارتی جنگ کا نیا موڑ

اس سے قبل بھی چینی صدر ایسے ہی دعوے کر چکے ہیں کہ وہ چینی منڈیوں میں غیر ملکی مصنوعات کے لیے محصولات میں کمی لائیں گے، تاہم ناقدین کے مطابق اس نئے خطاب میں قریب وہی الفاظ دہرائے گئے ہیں، جو چینی صدر اس سے قبل بھی کہتے آئے ہیں۔

شنگھائی میں ایک ہفتے دورانیے کی پہلی بین الاقوامی درآمدی نمائش کا آغاز پیر پانچ نومبر سے ہوا ہے، جو جمعہ 10 نومبر تک جاری رہے گی۔  اس نمائش میں تین ہزار نمائش کنندگان شریک ہیں، جن کا تعلق دنیا کے ایک سو تیس ممالک سے ہے۔ غیرملکی کمپنیاں ایک اعشاریہ تین ارب آبادی کے ملک اور دنیا کی دوسری سب سے بڑی معیشت کی منڈی تک رسائی چاہتی ہیں، تاہم انہیں اس سلسلے میں کئی طرح کے چیلنجز کا سامنا رہا ہے۔

اس نمائش کے افتتاح کے موقع پر شی جن پنگ نے کہا کہ وہ درآمدات میں اضافہ، محصولات میں کمی اور نان ٹیرف مشکلات میں کمی کے علاوہ حقوقِ دانش کے تحفظ کے لیے بھی اقدامات کریں گے۔ انہوں نے دعویٰ کیا کہ چین اگلے پندرہ برسوں میں تیس ٹریلین ڈالر کی مصنوعات اور دس ٹریلین ڈالر کی خدمات حاصل کرے گا۔ تاہم انہوں نے اس سلسلے میں تفصیلات نہیں بتائیں۔

یہ بات اہم ہے کہ امریکی صدر ڈونلڈ ٹرمپ چین پر مسلسل دباؤ ڈال رہے ہیں کہ وہ اپنی منڈیاں غیرملکی کمپنیوں کے لیے کھولے اور تجارتی فرق کو کم کرنے کے علاوہ امریکی حقوقِ دانش کے تحفظ کے لیے اقدامات کرے۔ اسی تناظر میں امریکا نے اربوں ڈالر کی چینی مصنوعات پر محصولات میں زبردست اضافہ کیا ہے۔

چیس وینٹر، ع ت، ع الف