روم کئی دہائیوں بعد برف کی دبیز تہہ میں

سینٹ پیٹرز اسکوائر میں پادری اور مذہبی اسکول کے طلبہ ایک دوسرے پر برف اچھال رہے ہیں۔ روم میں برفباری شاذ ونادر ہی ہوتی ہے مگر جب بھی ہوتی ہے تو زندگی جیسے رُک سی جاتی ہے۔ روم کی میئر ورجینیا راگی نے تو اسکول بند رکھنے کا حکم جاری کر دیا ہے۔

روم کا معروف ترین سیاحتی مقام کلوزیم بھی اس برفباری کے بعد بند کر دیا گیا ہے۔ جبکہ حکام نے لوگوں سے کہا ہے کہ وہ ہر ممکنہ حد تک اپنے گھروں پر ہی رہیں۔

ظاہر ہے یہ بچے ان ہدایات پر عمل نہیں کر رہے بلکہ انہیں اسکول نہ جانے کے سبب جیسے ہی یہ موقع ہاتھ لگا ہے یہ برف سے ڈھکے پارکوں میں جا کر برفباری سے لطف اندوز ہو رہے ہیں۔

بحیرہ روم کے کنارے آباد روم میں عام طور پر موسم سرما زیادہ سرد نہیں ہوتا۔ اور عام طور پر سال کے سرد ترین موسم کے دوران بھی ریستوران باہر کھلی جگہوں پر بیٹھنے کا انتظام برقرار رکھتے ہیں۔

روم کے پارک جو عام طور پر سردیوں میں بھی سرسبز ہی رہتے ہیں، اب برف سے ڈھکے ہوئے ہیں اور یہاں تک کے ایک اور معروف سیاحتی مقام ’چرکو ماسیمو‘ بھی برفباری سے سفید ہو گیا ہے۔

روم شاذ ونادر ہونے والی اس برفباری کے سبب اس طرح کی ایمرجنسی سے نمٹنے کی صلاحیت نہیں رکھتا۔ اسی باعث شہری انتظامیہ نے قریبی علاقوں سے درخواست کی کہ وہ سڑکوں سے برف ہٹانے کے لیے مشینری روانہ کریں۔ چار گھنٹوں سے بھی کم وقت میں 10 سینٹی میٹر تک برف گرنے کے سبب روم کے مرکزی ایئرپورٹ کو مجبوراﹰ صرف ایک ہی رن وے سے کام چلانا پڑا۔