دنیا کے سب سے بڑے مجسمے کا افتتاح

بھارتی وزیر اعظم نریندر مودی نے بھارت کی تحریک آزادی کے ایک اہم رہنما سردار والبھ بھائی پٹیل کے 182 میٹر بلند اس مجسمے کی رونمائی کی۔ اس موقع پر بھارتی ایئرفورس کے جیٹ طیاروں نے فضائی کرتب دکھائے جب ہیلی کاپٹرز نے اس مجسمے پر پھولوں کی پتیاں نچھاور کیں۔ اس کے علاوہ سبز، نارنجی اور سفید رنگ کی آتش بازی بھی کی گئی جو بھارتی پرچم کے رنگ ہیں۔ انسانی حقوق کے لیے کام کرنے والے کارکنوں کا کہنا ہے کہ ان کے درجنوں رہنماؤں کو اس مجسمے کی نقاب کشائی سے قبل گرفتار کر لیا گیا۔

نریندر مودی نے مجسمے کی رونمائی کے موقع پر سردار پٹیل کی 1947ء میں تقسیم بر صغیر کے بعد ملک کو متحد کرنے کے لیے ’اسٹریٹیجک سوچ‘ کو خراج تحسین پیش کرتے ہوئے کہا، ’’آج کا دن بھارت کی تاریخ میں یاد رکھا جائے گا۔‘‘ سردار پٹیل کے اس مجمسے کو مجسمہ اتحاد یا ’اسٹیچو آف یونیٹی‘ کا نام دیا گیا ہے۔ مودی کے مطابق یہ مجسمہ، ’’ہماری انجینیئرنگ اور تیکنیکی دلیری کی علامت ہے۔‘‘

یہ مجسمہ بھارتی ریاست گجرات کے ایک دور دراز حصے میں تعمیر کیا گیا ہے۔ خبر رساں ادارے اے ایف پی کے مطابق اس مجسمے کی رونمائی کے وقت اس کے گرد پانچ ہزار سے زائد پولیس اہلکار تعینات تھے۔ اس میگا پراجیکٹ کی تکمیل پر چار برس سے زائد عرصہ لگا۔ اس کی تعمیر میں شریک ساڑھے تین ہزار ورکرز میں سینکڑوں چینی بھی شامل تھے۔

ریاست گجرات کے ضلع نربدا کے ایک کمیونٹی گروپ لیڈر آنند مزگاؤنکر کے مطابق سادہ لباس میں ملبوس پولیس اہلکار منگل کی شب 12 افراد کو مقامی پولیس اسٹیشن لے گئے۔ پولیس نے تاہم اس بات کی تردید کی ہے کہ اس نے کسی کو حراست میں لیا۔ حکام کی طرف سے مقامی افراد کے متوقع احتجاج کو روکنے کے لیے بھرپور اقدامات کیے گئے تھے۔ مقامی افراد کا تقاضہ ہے کہ جس زمین پر 29.9 بلین بھارتی روپے (400 ملین امریکی ڈالرز) سے یہ مجسمہ تعمیر کیا گیا ہے اس کی قیمت انہیں ادا کی جائے۔ مقامی آبادیوں کے 22 مقامی سربراہوں نے مودی کو ایک خط لکھا تھا جس میں کہا گیا تھا کہ وہ اس مجسمے کی رونمائی سے باز رہیں۔

'اسیٹیچو آف یونیٹی‘ نامی سردار پٹیل کا یہ مجسمہ امریکا کے مجسمہ آزادی سے قریب دو گنا اونچا ہے۔ اس کی تیاری میں قریب ایک لاکھ ٹن کنکریٹ اور اسٹیل استعمال ہوا ہے۔ اس مجسمے کو دیکھنے کے لیے 153 میٹر بلند ڈیک میں داخلے کے لیے ٹکٹوں کی آن لائن فروخت شروع کر دی گئی ہے جس کی قیمت 350 بھارتی روپے ہے۔ یہ رقم 4.75 امریکی ڈالرز کے برابر بنتی ہے۔ بھارتی حکام کو امید ہے کہ ریاست گجرات کے دور دراز مقام پر بنائے گئے اس مجسمے کو روزانہ قریب 15 ہزار افراد دیکھنے کے لیے آئیں گے۔ اس مجسمے سے قریب ترین شہر ودودرا ہے جو 100 کلومیٹر کی مسافت پر ہے۔

ا ب ا / ع ح (اے ایف پی)