دنیا کی بہترین بلند و بالا عمارت کا ایوارڈ سویڈن کے نام
سن 2020 کا انٹرنیشنل ہائی رائز ایوارڈ اسٹاک ہوم کی عمارت کو دیا گیا ہے۔ ایوارڈ دیتے وقت یہ دیکھا جاتا ہے کہ عمارت کتنی ماحول دوست، اختراعی اور حسین ہے۔
بصری منظر تبدیل
سویڈن کے دارالحکومت اسٹاک ہوم کی بلند و بالا رہائشی عمارت "نورا ٹورنن" کے جڑواں ٹاوز شہر کے نئے ڈسٹرکٹ ہاگسٹاڈن میں واقع ہے۔ اس عمارت کے چوکور ڈیزائن والی بالکونیوں نے شہر کے بصری منظر کو تبدیل کر دیا ہے۔ ایوارڈ دینے والی کمیٹی نے اسے شہر کی خوبصورتی بڑھانے میں ایک اچھا اضافہ قرار دیا۔
اسٹراٹ فورڈ، لندن
انٹرنیشنل ہائی رائز ایوارڈ کے لیے منتخب کی جانے والی پانچ عمارتوں میں لندن کی اسٹراٹ فورڈ نامی بلڈنگ بھی شامل تھی۔ اس کو دوسری پوزیشن دی گئی۔ بہترین عمارت کا ایوارڈ سن 2004 سے ہر دو سال بعد دیا جاتا ہے۔ عام طور پر اس کی تقریب جرمن شہر فرینکفرٹ کے سینٹ پالز چرچ میں منعقد کی جاتی ہے۔
زندگی کا حامل ڈیزائن
اسٹراٹ فورڈ کا شمار لندن کی شاندار عمارتوں میں ہوتا ہے۔ ایوارڈ کمیٹی کا کہنا ہے کہ یہ عمارت زندگی سے عبارت ہے کیونکہ اس میں سرسبز جگہیں بھی موجود ہیں۔ رواں برس کے ایوارڈ کے لیے چودہ ممالک سے اکتیس عمارتوں کے درمیان مقابلہ تھا، جن میں اس بلڈنگ کو ایک منفرد مقام حاصل رہا۔
اومنی ٹُرم، فریکفرٹ
جرمن شہر فرینکفرٹ میں تعمیر کی جانے والی یہ عمارت ایک شاہکار ہے۔ اس میں ہوٹل، دفاتر، اپارٹمنٹس اور دوکانیں موجود ہیں۔ اس عمارت کو جرمنی میں ڈیزائن کے ایک نئے رجحان کا آغاز قرار دیا گیا ہے۔
تازہ ہوا کا جھونکا
یہ تصویر فرینکفرٹ کی عمارت اومنی ٹُرم کا ایک کلوز اپ ہے، جس میں بیچ کی چند منزلیں بظاہر ہلی ہوئی لگتی ہیں۔ ماہرین کے مطابق اس عمارت کا ڈزائن اور تصور ایک تازہ ہوا کے جھونکے کی مانند ہے۔ ایوارڈ کمیٹی نے اومنی ٹُرم کو ایک نئی طرزِ تعمیر کی مثال قرار دیا۔
ایڈن، سنگا پور
سنگا پور میں تعمیر ہونے والی اس بلند و بالا عمارت کا نام ’ایڈن‘ ہے۔ اس اونچی عمارت میں ہر منزل پر سبزہ ہے۔ یہ عمارت ’باغیچوں کے شہر‘ سنگا پور کی بہترین مثال بن کر ابھری ہے۔ ایوارڈ کمیٹی کو اس عمارت میں سبزے کی موجودگی نے خاص طور پر متاثر کیا۔
ہریالی کی کشش سے انکار ممکن نہیں
یہ تصویر سنگاپور کی عمارت ’ایڈن‘ کی ایک منزل سے لی گئی ہے۔ اس عمارت میں تازگی کے لیے سرسبز پودے خاص انداز میں رکھے گئے ہیں۔ ایوارڈ کمیٹی کی سربراہ اَنے ماعود ژوپن کا کہنا ہے کہ اس عمارت میں ہریالی کی کشش سے انکار ممکن نہیں۔
لیزا سوہو، بیجنگ
زھا حدید کا انتقال سن 2016 میں چکا ہے لیکن ان کی قائم کردہ تعمیراتی کمپنی اس وقت بھی تعمیرات کی دنیا کا ایک معتبر ادارہ ہے۔ بیجنگ میں تعمیر ہونے والی یہ عمارت زھا حدید کی کمپنی کا شاہکار ہے۔ اس کے اندرون کو شیشے سے جوڑا گیا ہے جس سے دیکھنے میں یہ دو جڑواں عمارتیں ایک ہونے کا گمان ہوتا ہے۔
جدید اور شاعرانہ
یہ لیزا سوہو کی اندر سے لی گئی تصویر ہے۔ اس عمارت کے دونوں ٹاورز کے بیچ ایٹریم دنیا کا سب سے اونچا ایٹریم ہے جو ایک سو نوے میٹر بلند ہے۔ اس کا متاثرکن بل کھاتا ڈزائن جدید اور شاعرانہ قرار دیا گیا ہے۔