دنیا میں اسلحے کی فروخت میں کچھ کمی

سویڈن کے دارالحکومت سٹاک ہولم میں قائم اس ادارے نے اپنے یہ اعداد و شمار جمعہ اکتیس جنوری کو جاری کیے۔ اس ادارے کے مطابق روسی صدر ولادیمیر پوٹن کی طرف سے شروع کیے گئے اسلحہ بندی کے پروگراموں کی وجہ سے 2012ء میں روسی اسلحہ ساز کمپنیوں کی جانب سے ہتھیاروں کی فروخت میں بڑے پیمانے پر اضافے کا رجحان دیکھنے میں آیا تاہم باقی دنیا میں اسلحے کی فروخت میں مسلسل دوسرے برس کچھ کمی دیکھنے میں آئی۔

’سِپری‘ کے مطابق جہاں 2012ء میں ریاست ہائے متحدہ امریکا، کینیڈا اور بہت سے مغربی یورپی ملکوں کی اسلحہ ساز کمپنیوں کی جانب سے ہتھیاروں کی فروخت میں کمی ہوئی، وہیں روسی کمپنیوں کی جانب سے اسلحے کی فروخت میں اٹھائیس فیصد اضافہ دیکھا گیا۔

ادارے کے مطابق روسی اسلحہ ساز کمپنیوں کے اس بڑھتے ہوئے کاروبار کے پیچھے دو ہزار گیارہ سے لے کر دو ہزار بیس تک کا سات سو ارب ڈالر کا اسلحہ بندی کا ریاستی پروگرام کارفرما ہے۔

SIPRI کے فوجی اخراجات اور اسلحے کی پیداوار کے پروگراموں کے شعبے کے ڈائریکٹر سَیم پَیرلو فریمین نے کہا کہ ’روسی اسلحہ ساز صنعت سوویت صنعت کے کھنڈرات کے سائے سے اب بتدریج باہر نکل رہی ہے‘۔ تاہم ساتھ ہی انہوں نے یہ بھی کہا کہ ’روسی اسلحہ ساز صنعت ابھی بھی متروک آلات، غیر مؤثر انتظامی ڈھانچوں اور بڑے پیمانے پر پھیلی ہوئی بد عنوانی جیسے مسائل سے دوچار ہے اور یہ مسائل ٹیکنالوجی کے اعتبار سے مغربی دنیا کا مقابلہ کرنے کی روسی صلاحیت کو آئندہ بھی محدود بنائے رکھیں گے‘۔

پَیرلو فریمین نے نیوز ایجنسی روئٹرز سے باتیں کرتے ہوئے کہا کہ اعداد و شمار سے یہ پتہ نہیں چلتا کہ روسی اسلحہ کن ممالک کو فراہم کیا جاتا ہے تاہم یہ بات طے ہے کہ اس اسلحے کی بڑی مقدار براعظم ایشیا کو فراہم کی جاتی ہے۔ روس بھارت کو اسلحہ فراہم کرنے والا بڑا ملک ہے جبکہ ’سِپری‘ کے اعداد و شمار کے مطابق دو ہزار آٹھ سے لے کر دو ہزار بارہ تک کے عرصے کے دوران بھارت دنیا بھر میں سب سے زیادہ مقدار میں اسلحہ درآمد کرنے والا ملک رہا۔ جہاں روس کو خانہ جنگی کے شکار عرب ملک شام کو اسلحہ فراہم کرنے والے ایک بڑے ملک کی حیثیت حاصل رہی ہے، وہیں چین اور وینزویلا بھی روسی اسلحہ خریدنے والے بڑے ملکوں میں شامل ہیں۔

سویڈن میں قائم اس ادارے کے مطابق 2012ء میں دنیا کی ایک سو بڑی اسلحہ ساز کمپنیوں نے 395 ارب ڈالر کے ہتھیار فروخت کیے اور یہ کہ یہ رقم گزشتہ سال کے مقابلے میں 4.2 فیصد کم ہے۔ اُس سے گزشتہ برس اسلحے کی فروخت میں 6.6 فیصد کمی ریکارڈ کی گئی تھی۔ مجموعی اعتبار سے دیکھا جائے تو اسلحہ ساز کمپنیوں کی فروخت میں 2003ء کے بعد سے تقریباً تیس فیصد اضافہ دیکھنے میں آیا ہے۔

دنیا کی ایک سو بڑی اسلحہ ساز کمپنیوں کو اسلحے کی فروخت سے حاصل ہونے والی آمدنی کے اعتبار سے دیکھا جائے تو امریکا میں قائم کمپنیوں کا حصہ58 فیصد جبکہ مغربی یورپی ملکوں کا 28 فیصد رہا۔ ’سِپری‘ کے مطابق 2012ء کے دوران بہت سی امریکی کمپنیوں کی جانب سے اسلحے کی فروخت میں کمی کے سلسلے میں بڑا کردار 2011ء کے آخر میں عراق سے امریکی فوجوں کے انخلاء نے ادا کیا۔

اس رپورٹ میں ڈیٹا دستیاب نہ ہونے کی وجہ سے چین کو شامل نہیں کیا گیا، جو ہتھیار تیار اور برآمد کرنے والا ایک بڑا ملک ہے۔