خاشقجی کا قتل: ترک صدر ایردوآن ’ساری تفصیلات‘ آج بتائیں گے

استنبول سے ملنے والی نیوز ایجنسی ڈی پی اے کی رپورٹوں کے مطابق صدر رجب طیب ایردوآن نے وعدہ کیا ہے کہ جمال خاشقجی کے قتل سے متعلق اب تک ترک حکام کو دستیاب تمام تفصیلات وہ آج اپنی جماعت اے کے پی کے ارکان کے ایک اجتماع سے خطاب کے دوران بیان کر دیں گے۔

صدر ایردوآن نے استنبول میں کہا کہ وہ ایسا کرنے کا ارادہ اس لیے رکھتے ہیں کہ جمال خاشقجی کی ہلاکت سے متعلق ’ہم سب کو انصاف کی تلاش ہے‘ اور سچ سامنے آنا ہی چاہیے۔

خاشقجی امریکا میں مقیم، امریکی اخبار واشنگٹن پوسٹ کے کالم نگار اور ایک ایسے سعودی شہری تھے، جو ریاض حکومت پر تنقید کرتے تھے۔ وہ دو اکتوبر کو استنبول کے سعودی قونصل خانے گئے تھے اور اس کے بعد سے مسلسل لاپتہ تھے۔ گزشتہ ہفتے کے دن سعودی حکام نے تسلیم کر لیا تھا کہ خاشقجی قونصل خانے میں ہلاک ہو گئے تھے۔

پھر ایک روز بعد گزشتہ اتوار کے دن سعودی وزیر خارجہ عادل الجبیر نے پہلی مرتبہ خاشقجی کی موت کے لیے ‘قتل‘ کا لفظ استعمال کرتے ہوئے کہا تھا کہ اس سعودی صحافی کی ہلاکت ایک ’بہت بڑی اور سنگین غلطی‘ تھی، جو ’مجرمانہ اقدامات کے مرتکب چند افراد کی غیر قانونی طور پر کی گئی انفرادی کارروائی‘ کا نتیجہ تھی۔

سعودی حکام نے جمال خاشقجی کے استنبول کے قونصل خانے میں قتل کا اعتراف ان کی مبینہ گمشدگی کے 18 روز بعد کیا تھا۔ ترک تفتیشی ماہرین کے مطابق خاشقجی کو سعودی کمانڈوز کی ایک ایسی پندرہ رکنی ٹیم نے قتل کیا تھا، جو خاص طور پر سعودی عرب سے استنبول پہنچی تھی۔

اس بارے میں سب سے پریشان کن پہلو یہ بھی ہے کہ ان سعودی کمانڈوز نے مبینہ طور پر پہلے خاشقجی کی انگلیاں کاٹ دی تھیں اور پھر انہیں قتل کر کے ان کی لاش کے ٹکڑے کر دیے تھے۔ لیکن سعودی حکومت ابھی تک اس بارے میں لاعلمی کا اظہار کر رہی ہے کہ خاشقجی کی لاش کہاں ہے یا اس کا کیا بنا۔

اسی دوران سعودی وزیر خارجہ عادل الجبیر نے آج منگل کے روز انڈونیشیا کے دارالحکومت جکارتہ میں صحافیوں سے بات چیت کرتے ہوئے ایک بار پھر کہا کہ خاشقجی کی ہلاکت کی ’جامع تحقیقات‘ کرائی جائیں گی۔

الجبیر نے کہا کہ ریاض حکومت نے سعودی ماہرین کی ایک ٹیم بھی ترکی بھیجی ہے اور اس قتل میں ملوث تمام افراد کو گرفتار کر کے انہیں سزائیں دلوائی جائیں گی۔

م م / ع ح / ڈی پی اے، اے ایف پی