جڑی بوٹیاں اور مصالحہ جات صحت کا راز
مصالحے اور جڑی بوٹیاں کھانے کو منفرد ذائقہ دینے کے ساتھ ساتھ صحت کے لیےنہایت مفید ہوتے ہیں۔حیرت انگیز بات یہ ہے کہ یہ سودمند مصالحے آپ کے اپنے باورچی خانے میں موجود ہیں۔
ہائی بلڈ پریشر سےچھٹکارہ؟ لہسن استعمال کیجیئے
لہسن خوشبو کے اعتبار سے یقیناً خوشگوار نہیں ہوتا مگر یہ گندھک پر مشتمل ایک ایسا مرکب ہے جو بیک وقت اینٹی بیکٹیریل، اینٹی فنگل اور اینٹی وائرل خصوصیات کا حامل ہوتا ہے۔لہسن کا استعمال خون جمنے کی بیماری ’’تھرومبوسز‘‘ سے بچاؤ کے لیے بھی مفید ہے۔
’’تھایئم‘‘ جنگلی پودینہ
ویسے تو دو سو طرح کےجنگلی پودینے پائے جاتے ہیں۔لیکن عام طور پر ’تھامس ولگیرس‘ استعمال کیا جاتا ہے۔تھایئم میں قدرتی طور پر روزمرینک ایسڈ پایا جاتا ہے۔یہ نہ صرف کولیسٹرول کو کنٹرول میں رکھنے کے لیے مفید ہے بلکہ نزلہ کھانسی کا تیر با ہدف علاج ہے۔
میٹابولزم کو فعال رکھنے کے لیے دار چینی کا استعمال بڑھائیے
انسانی جسم میں میٹابولزم کی رفتار کو بڑھانےکے لیے دار چینی کو غذا میں شامل کیجیے۔جسم کا طاقتور میٹابولزم غذائی اجزا سے توانائی لے کر خون تک پہنچاتا ہے۔ حساس جگر کے حامل افراد کو تاہم دارچینی کے استعمال میں محتاط رہنا چاہیے۔ ان کےلیے یہ خوشبودار چھال نما مصالحہ نقصان دہ ثابت ہو سکتا ہے۔
ذہنی سکون بڑھایئے، زعفران کھایئے
صحت کو اچھا رکھنے کے لیے جسمانی صحت کے ساتھ ساتھ دماغی صحت بھی ضروری ہے۔ طبی مطالعہ سے پتہ چلتا ہے کہ زعفران انسانی نفسیات اور دماغ کو سکون اور خوشحالی بخشتا ہے۔ دلربا خوشبو والی زعفران خواتین میں ماہواری سے قبل پیدا ہونے والی تکالیف میں راحت فراہم کرتا ہے۔
بادیان کا پھول پیٹ کا درد کم کرنے کے لیے مفید
بادیان کے پھول کی دو اقسام پائی جاتی ہیں جن میں ایک خاص طرح کا تیل پایا جاتا ہے۔اس میں ملیٹھی اور سونف جیسی خوشبو پائی جاتی ہے۔بادیان کا پھول نظام ہاضمہ سے جڑُے پٹھوں کو نرم کردیتا ہے۔دونوں طرح کے بادیان کے پھول سوزش کم کرنے کا ماخذ ہیں۔
جسمانی سوزش کا علاج ادرک
ادرک کا ترش ناخوشگوار ذائقہ اپنی جگہ مگر سردی میں ٹھنڈ سے بچاؤ میں ادرک کی اہمیت اپنی مثال آپ ہے۔ جوڑوں اور گٹھیے کے درد کے لیے چائینیز اور آیوویدک ادویات میں ادرک کا استعمال زمانہ قدیم سےکیا جارہا ہے۔ ادرک جوڑوں کا درد بھگانے میں بہت مفید ثابت ہوتا ہےاس میں پایا جانے والا تیل اور اینٹی آکسیڈنٹس گوناگوں بیماروں سےتحفظ فراہم کرتا ہے۔
ہر مسئلے کا حل؟ ہلدی
ہلدی کا استعمال اکثر سالن میں کیا جاتا ہے۔ہلدی کولیسٹرول میں کمی لاتی ہے۔جسم میں عمل تکسید اور سوزش کے لیے مفید ہے۔الزائمر ایک ایسی بیماری جس میں عمر رسیدہ افراد یاداشت کی کمزوری میں مبتلا ہوجاتے ہیں۔ہلدی یاداشت کو بہتر بنانے میں مفید ثابت ہوتی ہے۔