جرمنی بدر ہونے والے چودہ افغان اپنے ملک پہنچ گئے

برلن حکومت کی جانب سے چودہ ایسے افغان تارکین وطن کے ایک گروپ کو ملک بدر کردیا گیا ہے، جن کی پناہ کی درخواستیں مسترد ہو چکی تھیں۔ ملک بدر کیے جانے والے ان افغان شہریوں کو جرمن شہر فرینکفرٹ سے ایک پرواز کے ذریعے کابل بھیجا گیا۔ افغان حکام نے اس بات کی تصدیق کی ہے کہ یہ چودہ افغان مہاجرین آج بدھ پانچ دسمبر کی صبح سات بجے کابل پہنچ چکے ہیں۔

سن 2016 سے اب تک جرمنی سے افغانستان ملک بدر ہونے والا یہ انیسواں گروپ ہے۔ اعداد و شمار کے مطابق چار سو انتالیس افغان مہاجرین کو ملک بدر کیا جاچکا ہے۔

دوسری طرف جرمنی میں افغان مہاجرین کی ملک بدری پر تنقید کا سلسلہ بھی جاری ہے۔ ناقدین کا کہنا ہے کہ افغانستان محفوظ ملک نہیں کیونکہ وہاں طالبان اور داعش کے جنگجؤں کی جانب سے مسلسل حملےجاری ہیں۔

مزید افغان مہاجرین کی جرمنی بدری، تنقید کا سلسلہ بھی جاری

واضح رہے رواں برس جولائی میں جرمنی سے واپس افغانستان بھیجے جانے کے بعد ایک افغان مہاجر نے خودکشی کرلی تھی۔ یہ تئیس سالہ افغان شہری جرمنی میں آٹھ برس سے رہائش پذیر تھا۔

افغان ملٹری ذرائع نے بتایا ہے کہ مختلف حملوں اور جھڑپوں میں اوسطاﹰ یومیہ پینتیس سکیورٹی اہلکار ہلاک ہورہے ہیں۔ اقوام متحدہ کی ایک رپورٹ کے مطابق رواں برس 2798 افغان شہری بھی ہلاک ہوچکے ہیں۔

ع آ / ا ب ا (ڈی پی اے)