جرمن چڑیا گھر سے بھاگنے والے شیر اور چیتے واپس پنجروں میں

جرمنی کے مغربی شہر لوئنے برگ میں ’آئفل چڑیا گھر‘ سے یہ جانور سیلاب اور طوفان کے بعد ایک حفاظتی باڑ کے گر جانے کے نتیجے میں فرار ہوئے تھے۔ حکام کا کہنا ہے کہ چڑیا گھر سے فرار ہو جانے والے ایک ریچھ کو مجبوراﹰ گولی مار دینا پڑی۔

مقامی میڈیا کے مطابق باقی جانوروں کو ڈھونڈنے کے لیے ڈرونز کی مدد لی گئی، جو اس چڑیا گھر کے احاطے ہی میں موجود تھے۔ ان خطرناک جانوروں کی تلاش شروع کرنے سے قبل حکام نے علاقے کے رہائشیوں کو اپنے گھروں کے دروازے اور کھڑکیاں بند رکھنے کے لیے بھی کہہ دیا تھا۔

مقامی انتظامیہ نے تاحال یہ تفصیلات نہیں بتائیں کہ یہ پانچوں خطرناک جانور چڑیا گھر سے فرار کیسے ہوئے اور انہیں تلاش کیسے کیا گیا۔ اطلاعات کے مطابق اکتیس مئی اور یکم جون کی درمیانی شب اس علاقے میں شدید طوفان باد و باراں آیا تھا۔ اس طوفان کے نتیجے میں چڑیا گھر کے احاطے میں ’سیلاب کی سی صورت حال‘ پیدا ہو گئی تھی اور کئی جانوروں کے پنجرے بھی جزوی طور پر زیر آب آ گئے تھے۔ اس کے علاوہ ان پنجروں کے ارد گرد کے کھلے علاقے میں لگائی گئی باڑ کو بھی کجئی جگہوں پر نقصان پہنچا تھا۔

لوئنے برگ میں ’آئفل زُو‘ نامی چڑیا گھر مختلف جانوروں کی ساٹھ کے قریب ملکی اور غیر ملکی اقسام کا گھر ہے۔ تیس ہیکٹر رقبے پر قائم کیے گئے اس چڑیا گھر میں کل قریب چار سو جانور رکھے گئے ہیں، جن میں متعدد خطرناک گوشت خور جانور بھی شامل ہیں۔ ان میں سے سائبیریا کے شیر اور چیتے شائقین کے لیے خاص طور پر پرکشش قرار دیے جاتے ہیں۔

ص ح/ نیوز ایجنسیز