جرمن مداح نے فنکار کی ناک میں دم کر دیا

جرمن مداح اس وقت جنوبی کوریا کو خیرباد کہہ چکا ہے۔ اُس کو انتباہ کیا گیا تھا کہ وہ  پاپ موسیقی کی جنوبی کوریائی فنکارہ نائیون کا سوشل میڈیا پر تعاقب کرنا چھوڑ دے۔ تاہم اس نے پیغام رسانی کا سلسلہ بند نہیں کیا اور آخر میں اپنی پسندیدہ فنکارہ سے معذرتیں طلب کرنا شروع کر دیں۔

اس جرمن مداح کے ٹویٹر پر اکاؤنٹ کی شناخت 'جوش1994‘  ہے۔ اُس نے متعدد مرتبہ چوبیس سالہ فنکارہ نائیون کے نام اپنی محبت کے اظہار کے کئی ٹویٹ کیے۔ جنوبی کوریائی فنکارہ اپنے ملک کی لڑکیوں پر مشتمل ایک چھ رکنی میوزیکل بینڈ کا حصہ ہیں۔ اس عاشق نے یوٹیوب پر جنوبی کوریائی زبان میں سب ٹائٹل کے ساتھ بھی محبت کے اظہار کے پیغامات اپ لوڈ کیے۔

جرمن مداح نے اس حسین فنکارہ کے ساتھ براہ راست ملاقات یا رابطہ استوار کرنے کی کوششیں بھی کیں لیکن وہ اس میں ناکام رہا۔ اس نوجوان عاشق نے اپنی محبوب فنکارہ کے لیے تحائف بھی ارسال کیے لیکن براہ راست رابطے کے لیے کچھ بھی کارگر نہ ہوا۔ نائیون نے اس معاملے کی شدت دیکھتے ہوئے پولیس سے رابطہ کر کے سائبر سکیورٹی حاصل کر لی تھی۔

اس انداز پر نائیون کو تنگ کرنے پر جرمن مداح کو سوشل میڈیا پر شدید تنقید کا بھی سامنا کرنا پڑا۔ مبصرین کا خیال ہے کہ جنوبی کوریا کی مقبول پوپ میوزیکل اور فلم انڈسٹری کے فنکاروں کو مسلسل سوشل میڈیا پر ایسے مداح فالو کرتے ہیں۔ فنکاروں کے مطابق ایسے مداحین انہیں عاجز کر دیتے ہیں۔

ٹویٹر استعمال کرنے والوں نے جوش 1994 کو استعمال کرنے والے کو متنبہ کیا کہ وہ خواتین کو ہراساں کرنے کا سلسلہ بند کرے۔ اُسے یہاں تک کہا گیا کہ اُس نے حد کو پار کر لیا ہے اور یہ ایک خطرناک فعل ہے۔ کئی ناقدین نے جرمن مداح کو بتایا کہ لڑکیاں اب اُس کے اکاؤنٹ سے خوفزدہ ہیں۔

یہ امر اہم ہے کہ سوشل میڈیا پر فنکاروں اور اداکاروں کو فالو یا پیغام روانہ کرنا ایک شدید مسئلہ بن چکا ہے۔ گزشتہ برس اکتوبرمیں ایک جنوبی کوریائی فنکار سُولی نے سوشل میڈیا پر پوسٹ کیے جانے والے مواد سے تنگ آ کر خود کشی کر لی تھی۔ ایک اور فنکارہ گو ہارا نومبر میں قابل اعتراض مواد سوشل میڈیا پر سامنے آنے پر شدید ڈیپریشن میں چلی گئی تھیں پھر انجام کار خودکشی کر لی۔

ژولیان رُوال (ع ح ⁄ ع ا)