جارج بُش، رچرڈ نکسن سے بھی زیادہ غیرمقبول: سروے
10 نومبر 2008سی این این/ opinion research corporation کے جائزے کے نتائج کے مطابق سروے میں حصّہ لینے والوں میں سے محض سولہ فی صد رائے دہنگان سمجھتے ہیں کہ امریکہ صحیح سمت کی طرف گامزن ہے، جبکہ 83 فی صد کا کہنا ہے کہ ملک میں سب کچھ ٹھیک نہیں ہے۔
سروے کے مطابق سن انیس سو پچھتر میں ’’واٹر گیٹ‘‘ سکینڈل کے نتیجے میں اُس وقت کے امریکی صدر، رچرڈ نکسن بھی اتنے غیرمعروف نہیں تھے جتنے کہ اس وقت صدر جارج بُش ہیں۔ سال رواں میں کرائے گئے تین مختلف جائزوں میں یہ بات سامنے آئی ہے کہ ستر فی صد سے زائد رائے دہنگان جارج بُش کی پالیسیوں سے خوش نہیں ہیں۔
سروے کے نتائج کے مطابق 76 فی صد رائے دہنگان کا یہ کہنا ہے کہ جس طریقے سے بُش ملک کے داخلی اور خارجی معاملات کو چلارہے ہیں، وہ صحیح نہیں ہے۔
تازہ سروے کے نتائج پیر کے روز منظر عام پر آئے جب نومنتخب امریکی صدر باراک اوباما اپنی اہلیہ مشیئل اوباما کے ہمراہ، جارج بُش سے ملنے وائٹ ہاوٴس پہنچے۔