تین بچیوں کی ہلاکت ’بھوک بہت سفاک ہوتی ہے‘

نئی دہلی پولیس نے تینوں بہنوں کی ہلاک ہو جانے کی تصدیق کرتے ہوئے بتایا ہے کہ مختلف ہسپتالوں کے ڈاکٹرز نے لاشوں کا دو مرتبہ طبی معائنہ کیا اور جس سے یہ ثابت ہوا کہ دو دن قبل ان تینوں بہنوں کے ہلاک ہونے کی وجہ خوراک کی کمی اور فاقہ تھی۔ رپورٹ کے مطابق ان کے معدے میں خوراک کا کوئی نشان نہیں ملا، ’’ممکنہ طور پر ان بچیوں نے سات آٹھ دنوں سے کچھ نہیں کھایا تھا۔‘‘

نئی دہلی کے نائب وزیر اعلٰی منیش سیسودیا نے بتایا کہ صوبائی حکومت نے مجسٹریٹ کی نگرانی میں اس واقعے کی تحقیقات کا حکم دے دیا ہے، ’’ یہ ایک ایسا واقعہ ہے، جس سے ہمارے سر شرم جھک گئے ہیں۔‘‘

بچیوں کے والد رکشہ چلاتے تھے تاہم کچھ دن قبل ان کا رکشہ چوری ہو گیا تھا، جس کے بعد وہ بے روز گار ہو گئے تھے۔ منیش سیسودیا نے بتایا کہ ان بچیوں کے والد کام کی تلاش میں نکلے ہوئے تھے اور وہ گھر واپس نہیں لوٹے۔ ان کی غیر موجودگی میں ہی یہ واقعہ رونما ہوا، ’’بچیوں کی والدہ  ذہنی مسائل کا شکار ہے‘‘۔

دو، چار اور آٹھ سال کی ان بہنوں کی لاشیں ان کی والدہ منگل کے روز مشرقی نئی دہلی کے ایک ہسپتال میں لائیں تھیں۔ پولیس افسر پنکج کمار سنگھ نے بتایا کہ ان کے جسموں پر تشدد کا کوئی نشان موجود نہیں تھا۔ بتایا گیا ہے کہ کرایہ نہ ہونے کی وجہ سے اس خاندان کو مکان سے زبردستی نکال دیا گیا تھا ، جس کے بعد یہ افراد شہر کی منڈاوالا نامی علاقے میں قائم ایک کچی بستی میں منتقل ہونے پر مجبور ہو گئے تھے۔

بچوں میں غذائی قلت کی شرح بھارت میں بہت زیادہ ہے۔ یہاں پر پانچ سال سے کم عمر38.4 فی صد بچوں کی مناسب نشو نما نہیں ہو پاتی۔