تشدد کا نشانہ بننے والے سیاسی پناہ کے حقدار، يورپی عدالت

يورپی عدالت برائے انصاف نے يہ فيصلہ منگل چوبيس اپريل کو سنايا ہے۔ فيصلے کے تحت يورپی کنونشن برائے انسانی حقوق کے تحت اگر تشدد کا نشانہ بننے والے سياسی پناہ کے متلاشی کسی درخواست گزار کو اس کے آبائی ملک واپسی پر طبی سہوليات کی عدم دستيابی اور ايسی صورتحال کا سامنا ہو کہ جس ميں اس کی حالت مزید بگڑ سکتی ہو، تو اسے پناہ فراہم کی جا سکتی ہے۔

برطانوی سپريم کورٹ نے سری لنکا کے تامل ٹائیگرز کے ايک سابقہ رکن کے حوالے سے اس بارے ميں يورپی عدالت برائے انصاف سے رجوع کيا تھا۔ اس شخص کا دعوی ہے کہ اسے سری لنکا کی افواج نے تشدد کا نشانہ بنايا تھا۔ برطانوی عدالت نے لکسمبرگ ميں عدالت سے درخواست کی تھی کہ اس بارے ميں کوئی فيصلہ کيا جائے کہ آيا ايسی صورتحال ميں سن 2004 کے يورپی ہدايت نامے کے تحت يورپی يونين سے باہر کے کسی ملک کے متاثرہ شخص کو کم سے کم ’سبسڈری پروٹيکشن‘ فراہم کی جا سکتی ہے۔

دستاويزات ميں اس سری لنکن شخص کا نام ’MP‘ بتايا گيا ہے اور وہ سن 2005 ميں ايک طالب علم کے طور پر برطانيہ پہنچا تھا تاہم تين برس بعد اس کے قيام کی اجازت ختم کر دی گئی تھی۔ اس نے ایک برس بعد سياسی پناہ کی درخواست دی جس ميں اس نے لکھا کہ اسے سری لنکا ميں فوج نے تشدد کا نشانہ بنايا تھا، جس سبب وہ شديد ذہنی دباؤ کا شکار رہا۔ ابتداء ميں اس کی درخواست مسترد کر دی گئی لیکن بعد ازاں يہ معاملہ عدالت عظمی تک پہنچا۔

يورپی عدالت برائے انصاف کے گيارہ ميں سے ايک جج نے پچھلے سال اپنے ريمارکس ميں لکھا تھا کہ سری لنکا واپسی پر متعلقہ شخص خود کشی کر سکتا ہے۔ اس جج کے مطابق سن 1984 کے کنونشن کے تحت چونکہ سری لنکا پر يہ الزام ہے کہ وہاں اس پر تشدد کيا گيا، اسی ملک کی يہ ذمہ داری بنتی ہے کہ اسے واپسی پر تحفظ فراہم کيا جائے۔

ع س / اا، نيوز ايجنسياں