بین الاقوامی افواج کارروائی بند کریں: افغان صدر کرزئی

افغان صدر کرزئی نے ہفتے کے روز مشرقی صوبے کنڑ کے ایک علاقے میں نیٹو کے حملے میں ہلاک ہونے والے بچّوں کے خاندان والوں سے تعزیت کی۔ اس موقع پر انہوں نے کہا کہ وہ وقار اور عجز کے ساتھ امریکہ اور نیٹو سے اپیل کرتے ہیں کہ وہ افغانستان میں اپنی فوجی کارروائیاں ختم کر دیں۔

پاکستان کا نام لیے بغیر حامد کرزئی نے کہا کہ نیٹو اور امریکہ کو چاہیے کہ وہ دہشت گردوں کے خلاف کارروائی سرحد پار جا کے کریں کیوں کہ نو برس بیت چکے ہیں اور وہ بھی یہ بات جانتے ہیں کہ دہشت گردی کہاں سے ہوتی ہے۔

افغان صدر نے ذرائع ابلاغ کے نمائندوں سے بات کرتے ہوئے کہا کہ افغان بہت صابر و شاکر ہوتے ہیں مگر اب ان کے صبر کا پیمانہ لبریز ہو چکا ہے۔

نیٹو کی جانب سے صدر کرزئی کے اس بیان پر کوئی تبصرہ اب تک سامنے نہیں آیا ہے۔

قبل ا زیں افغان صدر نے کنڑ میں ہلاکتوں پر امریکہ کی جانب سے تاسف کو رد کرتے ہوئے اسے ناکافی قرار دیا تھا۔

دریں اثناء رواں برس جولائی سے نیٹو افواج کے مرحلہ وار انخلاء کے حوالے سے جمعے کے روز برسلز منعقدہ اجلاس میں نیٹو کے دفاعی وزراء نئے ضوابط پر متفق ہو گئے ہیں۔ واضح رہے کہ افغانستان سے غیر ملکی افواج کا انخلاء سن دو ہزار چودہ تک مکمل کیے جانے کا اعلان نیٹو اور امریکہ کی جانب سے سامنے آ چکا ہے تاہم مغربی ممالک یہ بھی کہتے رہے ہیں کہ افواج کا انخلاء افغانستان کے زمینی حقائق کو سامنے رکھ کر ہی کیا جائے گا۔

رپورٹ: شامل شمس⁄  خبر رساں ادارے

ادارت: امجد علی