بھارتی خواتین کاریگر مرد کاریگروں سے اچھا ’تِرنگا‘ بناتی ہیں

اس کی وجہ یہ ہے کہ تولاسی گیری نامی گاؤں میں انڈیا کی واحد پرچم ساز سرکاری کمپنی قائم ہے جہاں کے مردوں کی اس کام میں مناسب مہارت نہ ہونے کے سبب یہاں کی خواتین بھارتی جھنڈے تیار کرتی ہیں۔

کرناٹکا کاٹن ویلیج انٹر پرائز کی سپر وائزر گرونز انا پُرنا کوٹی نے اے ایف پی کو بتایا،’’ مردوں میں عورتوں جتنی برداشت نہیں تھی اور پھر وہ پیمائش بھی غلط لیتے تھے۔ وہ بار بار سی کے ادھیڑتے۔ کئی کئی دن ایک جھنڈے پر لگانے کے بعد کام پر واپس لوٹ کر نہیں آتے تھے۔‘‘

دارالحکومت نئی دہلی سے قریب دو ہزار کلو میٹر دور اس گاؤں میں قائم جھنڈے بنانے کی سرکاری کمپنی میں چار سو افراد کام کرتے ہیں جن میں اکثریت خواتین کی ہے۔

جھنڈے بنانے کا کام مختلف مراحل میں اور دو مختلف مقامات پر کیا جاتا ہے۔ تولاسی گیری گاؤں میں کپاس کاتنے سے لے کر دھاگہ بنانے تک کا کام کیا جاتا ہے۔ اس کے بعد یہاں سے دو گھنٹے کی مسافت پر بن گیری گاؤں میں جھنڈوں کی کٹائی اور سلائی کی جاتی ہے۔

کپاس کاتنے سے لے کر پاؤں سے چلنے والی کھڈی پر دھاگہ بنانے کے عمل تک تمام مشکل مرحلوں کو خواتین ہی انجام دیتی ہیں۔ گزشتہ برس بھارتی پرچم بنانے والی خواتین کاریگروں نے ساٹھ ہزار ’ترنگے‘ یعنی انڈین جھنڈے بنائے تھے۔

ان دیہی خواتین کے بنائے جھنڈے نہ صرف بھارت میں سرکاری عمارت پر لہرائے جاتے ہیں بلکہ دنیا بھر میں انڈین سفارت خانوں میں بھی نصب کیے جاتے ہیں۔ اس کے علاوہ ملک کے ہر اسکول میں اور سرکاری کاروں پر بھی لگائے جاتے ہیں۔

نرملا ایس ایلاکل جو کمپنی کے چھپائی کے محکمے میں گزشتہ پندرہ سال سے کام کر رہی ہیں، نے اے ایف پی کو بتایا،’’ معمولی سی غلطی پر بھی تیارہ شدہ جھنڈے کو مسترد کر دیا جاتا ہے۔‘‘

کمپنی کے لیے کام کرنے والے زیادہ تر کاریگر خاص طور پر خواتین نے اپنے قریبی اضلاع کا سفر بھی نہیں کیا ہے۔ لیکن سپر وائز کوٹی کے مطابق اگرچہ زیادہ تر کاریگروں نے گاؤں سے باہر کی دنیا نہیں دیکھی تاہم اُن کے لیے یہ بات بہت فخر کا باعث ہے کہ اُن کے بنائے ہوئے جھنڈے بھارت اور دنیا بھر میں جاتے ہیں اور ہر کوئی انہیں سلیوٹ کرتا ہے۔

صائمہ حیدر / ع ح / اے ایف پی