بچوں کے ہاتھوں میں بندوقیں، عوام کی شدید تنقید

سوشل میڈیا پر شیئر کی جانے والی اس ویڈیو میں دیکھا جا سکتا ہے کہ بچوں نے سر سے پیروں تک کالا لباس پہنا ہوا ہے اور وہ لکڑی کی بندوقوں کے ساتھ ایک سٹرک پر پریڈ کر رہے ہیں۔ انڈونیشیا کو اس سال مئی میں خوفناک دہشت گردانہ کارروائیوں کا سامنا رہا۔ ان حملوں میں عسکریت پسندوں نے اپنے بچوں سے انڈونیشیا کے دوسرے بڑے شہر سرابیا میں خود کش حملے کروائے تھے۔

گزشتہ جمعے کو  انڈونیشیا کے یوم آزادی کے موقع پر مشرقی جاوا میں بچوں کی یہ پریڈ کرائی گئی تھی۔ اس روز عام طور پر ملک بھر میں پریڈ کرائی جاتی ہیں۔ پروبولنگو کے پولیس چیف نے نیوز ایجنسی اے پی کو بتایا کہ پولیس اس بات کی تحقیقات کر رہی ہے کہ یہ ویڈیو کس نے سوشل میڈیا پر ڈالی تھی۔ پولیس چیف کے مطابق،’’ مکمل ویڈیو اپ لوڈ نہیں کی گئی اور ایسے الزامات لگائے جا رہے ہیں کہ ویڈیو کو ایک خاص مقصد کے لیے کاٹ کر انٹرنیٹ پر اپ لوڈ کیا گیا ہے۔ اگر مکمل ویڈیو دکھائی جاتی تو کوئی غلط فہمی ہوتی ہی نہ۔‘‘

مقامی میڈیا کے مطابق تعلیم اور ثقافت کے وزیر مہاجر آفندی کا کہنا ہے کہ  اسکول کے سٹاف کا ہر گز مقصد بچوں میں انتہا پسندانہ سوچ پیدا کرنا نہیں تھا۔ اسکول کے پرنسپل نے تاہم اس پریڈ پر معافی مانگ لی ہے۔ ملک میں قائم ’نیشنل کاؤنٹر ٹیریرزم ایجنسی‘ کے سربراہ  بریگیڈئیر جنرل حملی کا کہنا ہے،’’ اس پریڈ کے خلاف عوام کا شدید ردعمل ایک مثبت اشارہ ہے، عوام میں شدت پسندی کے خلاف جذبات پائے جاتے ہیں۔‘‘

ب ج/ ا ا (اے پی)