بوروسیا ڈورٹمنڈ کی ٹیم کی بس کے قریب دھماکے
11 اپریل 2017جرمن خبر رساں ادارے ڈی پی اے کے مطابق بوروسیا ڈورٹمنڈ کی ٹیم کی بس تین دھماکوں کا نشانہ اُس وقت بنی جب یہ ٹیم موناکو کے ساتھ ہونے والے میچ کے لیے اسٹیڈیم جا رہی تھی۔
فٹ بال کی چیمپیئنز لیگ کا کوارٹر فائنل میچ ڈورٹمنڈ میں آج شام کھیلا جانا تھا۔ بوروسیا ڈورٹمنڈ ٹیم کے چیف ایگزیکٹیو ہانس یوآخم واٹزکے نے تصدیق کر دی ہے کہ دھماکے کے نتیجے میں ٹیم کے دفاعی کھلاڑی مارک بارٹرا زخمی بھی ہوئے ہیں، جنہیں فوری طور پر ہسپتال منتقل کر دیا گیا ہے۔ اطلاعات کے مطابق ہسپانوی کھلاڑی بارٹرا کے ہاتھ پر چوٹ آئی ہے۔
بوروسیا ڈورٹمنڈ کلب کی طرف سے جاری ہونے والے ایک ٹوئٹر پیغام کے مطابق اس واقعے کے بعد آج منگل 11 اپریل کو ہونے والا میچ مؤخر کرنے کا فیصلہ کیا گیا ہے۔ اب یہ میچ کل بدھ کی شام کھیلا جائے گا۔ کلب کے مطابق میچ کے ٹکٹ اب کل استعمال کیے جا سکیں گے۔
جرمن صوبے نارتھ رائن ویسٹ فیلیا کی پولیس کے ترجمان گُنار ورٹمان نے خبر رساں ادارے ایسوسی ایٹڈ پریس کو بتایا کہ ٹیم کی بس جیسے ہی ہوٹل سے روانہ ہوئی اس کے قریب تین دھماکے ہوئے۔ ترجمان کے مطابق ان دھماکوں کے نتیجے میں بس کا شیشہ ٹوٹنے کے سبب ایک کھلاڑی زخمی ہوا۔
بوروسیا ڈورٹمنڈ کلب کے مطابق اسپین سے تعلق رکھنے والے کھلاڑی مارک بارٹرا اب ’’محفوظ ہیں‘‘ اور اسٹیڈیم یا اس کے اطراف میں کسی قسم کا کوئی خطرہ نہیں ہے۔
خبر رساں ادارے اے ایف پی کا کہنا ہے کہ مقامی وقت کے مطابق شام کے سات بجے کے قریب یہ دھماکے اسٹیڈیم سے قریب 10 کلومیٹر کی دوری پر اُس وقت ہوئے جب بوروسیا ڈورٹمنڈ کلب کی بس وہاں سے گزر رہی تھی۔ اس واقعے کے بعد ٹیم کو واپس ہوٹل پہنچا دیا گیا۔