بورس جانسن نے شادی کر لی

برطانوی وزیر اعظم بورس جانسن نے اپنے منگیتر کیری سائمنڈز کے ساتھ شادی کر لی ہے۔ ان کے دفتر کی طرف سے بتایا گیا ہے کہ شادی کی سادہ سی تقریب ہفتے کے دن ویسٹ منسٹر کیتھیڈرل میں منعقد کی گئی، جس میں چیدہ چیدہ شخصیات کو مدعو کیا گیا تھا۔

آج اتوار 30 مئی کو برطانوی وزیراعظم کے دفتر سے جاری ہونے والے ایک بیان کے مطابق، ''وزیر اعظم اور محترمہ سائمنڈز نے گزشتہ روز سہ پہر میں ویسٹ منسٹر کیتھڈرل میں ہونے والی ایک تقریب میں شادی کر لی۔‘‘ اس بیان میں مزید کہا گیا ہے کہ یہ جوڑا اپنے خاندان اور دوستوں کے ساتھ آئندہ موسم گرما میں شادی کا جشن منائیں گے۔

چھبپن سالہ جانسن 2019ء میں وزیر اعظم بننے کے بعد سے تینتس سالہ کیری سائمنڈز کے ساتھ 10 ڈاوننگ سٹریٹ میں اکٹھے رہ رہے ہیں۔ اس جوڑے نے گزشتہ برس اعلان کیا تھا کہ انہوں نے منگنی کر لی ہے اور ان کے ہاں بچے کی پیدائش متوقع ہے۔ جانسن اور کیری سائمنڈز کے ہاں اپریل میں بیٹے کی پیدائش ہوئی جس کا نام ولفریڈ لاری نکولس جانسن رکھا گیا۔

شادی کی تقریب خفیہ رکھی گئی

شادی کی اس تقریب کو آخری وقت تک خفیہ رکھا گیا جبکہ اطلاعات ہیں کہ جانسن کے قدامت پسند پارٹی سے تعلق رکھنے والے قریبی ساتھیوں کو بھی آخری وقت تک اس شادی کی تقریب کے بارے میں علم نہیں تھا۔

خیال رہے کہ کووڈ کی وبا کے سبب برطانیہ میں لگی پابندیوں کے مطابق شادی کی تقریب میں زیادہ سے زیادہ 30 تک مہمان شرکت کر سکتے ہیں۔

ہفتے کے دن ویسٹ منسٹر کیتھڈرل کو دن قریب ڈیڑھ بجے اچانک بند کر دیا گیا جس کے قریب 30 منٹ بعد کیری سائمنڈز ایک لیموزین میں وہاں پہنچیں۔ انہوں نے شادی کا لمبا سفید جوڑا پہن رکھا تھا تاہم انہوں نے نقاب نہیں لگایا ہوا تھا۔

بورس جانسن کی دیگر شادیاں اور تعلقات

بورس جانسن اس سے قبل بھی دو بار شادی کر چکے ہیں۔ انہیں ایک بار کنزرویٹیو پارٹی کی پالیسی ٹیم سے اس وجہ سے الگ کر دیا گیا تھا کیونکہ انہوں نے شادی کے علاوہ اپنے تعلقات کے بارے میں جھوٹ بولا تھا۔ دو بار طلاق کے بارے میں تو سب جانتے ہیں تاہم بورس جانسن یہ بتانے سے انکاری ہیں کہ ان کے بچوں کی تعداد کتنی ہے۔

بورس جانسن کی سابق شادی ایک وکیل مارینا ویلر کے ساتھ تھی۔ ان دونوں کے چار بچے بھی ہیں۔ تاہم انہوں نے ستمبر 2018ء میں اعلان کیا تھا کہ وہ الگ ہو چکے ہیں۔

ا ب ا / ع ب (روئٹرز، اے پی)