برلن کرسمس مارکیٹ کا خونریز حملہ: اداروں کی غلطیوں کا نتیجہ

مسلم دہشت گرد انیس امری، جس نے 2016 ء میں برلن کی ایک کرسمس مارکیٹ پر حملہ کر کے 16 افراد کو ہلاک کر دیا تھا، اس کارروائی سے پہلے ہی وہ پولیس کی نگاہوں میں تھا۔ اس خونریز حملے کے بعد بہت سے افراد یہ سوال کر رہے ہیں کہ اگر پولیس کو انیس امری پر شکوک و شبہات تھے اور وہ اس پر نظر رکھے ہوئی تھی تو آخر یہ دہشت گرد کرسمس مارکیٹ پر حملہ کرنے میں کیسے کامیاب ہوا؟

اس سوال کا جواب تلاش کرنے کے لیے وفاقی جرمن پارلیمان کے ایوان نمائندگان کی انکوائری کمیٹی نے چھان بین کے بعد پیر 9 اگست کو اپنی حتمی رپورٹ پیش کی۔ اس رپورٹ میں  اس امر کا اقرار کیا گیا ہے کہ 2016  ء میں برلن کے کرسمس بازار پر ہونے والا حملہ دراصل سکیورٹی کے متعدد اداروں کی غلطیوں کے سبب ممکن ہوا۔  اس کمیٹی کے صدر اور کرسچن ڈیموکریٹک یونین سی ڈی یو کے سیاستدان اشٹیفان لنس کا اس رپورٹ کو منظر عام پر لاتے ہوئے کہنا تھا، '' اس واقعے کا کوئی ایک فریق قصوروار نہیں ہے۔ نا ہی کسی ایک فرد کی اس میں غلطی ہے جس کے سبب یہ دہشت گردانہ واقعہ رونما ہوا تھا۔‘‘ تاہم جرمن سیاستدان کا کہنا تھا کہ بہت سی غلطیاں مل کر اس کا سبب بنیں جن کا تعلق کرمنل پولیس اور تحفظ آئین کے ادارے سے ہے۔ انہوں نے کہا،'' ان غلطیوں اور کوتاہیوں کا نتیجہ 2016 ء کا دہشت گردانہ حملہ بنا۔‘‘

حتمی غلطی

جرمنی کی وفاقی پارلیمانی کمیٹی میں ہونے والی انکوائری کی رپورٹ میں یہ بھی کہا گیا ہے کہ سب سے فیصلہ کن امر یہ تھا کہ پناہ کے متلاشی تیونسی باشندے انیس امری کو صحیح طور پر جانچا یا سمجھا نہیں گیا۔ یاد رہے کہ امری کی سیاسی پناہ کی درخواست مسترد ہو چکی تھی۔ امری کو گرچہ زیادہ پر تشدد اور زیادہ خطرناک سمجھا جا رہا تھا تاہم 2016 ء موسم گرما سے اس پر سکیورٹی اداروں نے مکمل کڑی نظر نہیں رکھی نا ہی اسٹیٹ کرمنل آفس نے امری کو مبنیہ طور پر 'دھماکہ خیز خطرے‘ کا سبب قرار دیا تھا۔

برلن حملہ: پناہ کا متلاشی پاکستانی رہائی کے بعد کہاں ہے؟

تفتیشی کمیٹی کی کارروائی

امری کیس کی چھان بین یا انکوائری کمیٹی نے چار سالوں کے دوران 67 نشستوں یا میٹنگوں میں 97 گواہان جن میں تحفظ آئین کی عدالت کے استغاثہ، کرمنل پولیس کے محکمے کے متعدد افسران اورسیاستدان شامل تھے سے سوالات کیے۔ اس طویل اور مفصل انکوائری کے بعد سامنے آنے والی رپورٹ 1235 صفحوں پر مشتمل ہے۔ اس میں وفاقی پارلیمان کے متعدد سیاسی دھڑوں کے خصوصی رائے اور بیانات بھی شامل ہیں۔ اس کے علاوہ اس تفتیشی کارروائی میں وفاقی جرمن پولیس برائے جرائم کے دفتر کے کردار کا بھی تفصیلی جائزہ لیا گیا، جس کے بعد رپورٹ میں کہا گیا کہ امری کے  سلسلے میں  تمام اداروں نے غلط فہمی اور غلط تاثر سے کام لیا۔

حملے سے قبل کے مسائل

چار سال تک جاری چھان بین کے بعد امری کی طرف سے ہونے والے دہشت گردانہ حملوں کی جو وجوہات پیش کی گئیں ان میں ایک اہم وجہ یہ بھی شامل ہے کہ جرمنی میں مسلم انتہا پسندی اور دہشت گردی سے منسلک جرائم سے نمٹنے کے وفاقی دفتر کے عملے میں افرادی قوت کی کمی ہے۔ اس سلسلے میں پیرس میں ہونے والے حملے کے حوالے سے کہا گیا ہے کہ اُس کے بعد جرمنی میں اس عملے کے اراکین کی تعداد میں اضافہ کیا جانا چاہیے تھا جو نہیں ہوا۔ اس کے علاوہ برلن اور مغربی صوبے نارتھ رائن  ویسٹ فیلیا کے ریاستی دفاتر برائے انسداد جرائم جرمنی کی تحفظ آئین کی عدالت اور برلن کے دفتر استغاثہ کے مابین اس بارے میں ناکافی تبادلہ خیال کیا گیا اور امری سے لاحق ''مستقل خطرات سے نمٹنے کے لیے ناکافی انتظام کیا گیا۔‘‘کرسمس مارکیٹ پر حملہ: ایک دن، جو جرمنی کو بدل دے گا، تبصرہ

اس رپورٹ میں کہا گیا ہے کہ انیس امری پر ہر وقت کڑی نظر رکھی جانی چاہیے تھی اور اس کے ٹیلی فون کالس اور چیٹ وغیرہ کی ہر وقت نگرانی ضروری تھی۔ اس کے علاوہ 2016 ء میں ریاستی دفتر برائے انسداد دہشت گردی 'ایل کے اے‘ نے موسم گرما میں اپنی تفتیشی کاروائیوں کا مرکز انتہائی بائیں بازو کی انتہا پسندی کے واقعات اور مناظر پر مر کوز کر رکھی تھی۔

واضح رہے کہ جرمنی کا انسداد دہشت گردی کا نیا مرکز 2022 اور 2023 ء سے اپنا کام شروع کردے گا۔ پولیس محکمے کو 60 ملین یورو کی رقم فراہم کی گی ہے جس سے نئی گاڑیاں، ہتھیار اور حفاظتی وردیاں وغیرہ خریدی جائیں گی۔ علاوہ ازیں وفاقی جرمن پولیس کے 'آئی ٹی ڈپارٹمنٹ‘ کو بھی جدید تر بنایا جائے گا۔

ک م/ ع آ (ڈی پی اے، بی ڈی ٹی)