برازيل کے جنگلات میں آگ، فوج طلب

دنيا کے سب سے بڑے برساتی جنگل ايميزون کو ’زمين کے پھپھڑے‘ بھی کہا جاتا ہے اور اس کا ساٹھ فيصد حصہ برازيل ميں ہے۔ ايميزون کے درخت عالمی درجہ حرارت بڑھانے والی زيريلی کاربن ڈائی آکسائڈ کا سالانہ دو بلين ٹن اپنے اندر جزب کرتے ہیں۔ يہ دنيا کے بيس فيصد مختلف پودوں اور منفرد اقسام کا گھر بھی ہے۔

برازيل کے جنگلات ميں آگ لگنے کے اس سال اب تک پچہتر ہزار سے زائد واقعات پيش آ چکے ہيں۔ يہ تعداد پچھلے برس کے واقعات سے پچياسی فيصد زيادہ ہے۔ رواں سال آگ لگنے کے آدھے سے زیادہ واقعات ايميزون کے جنگلات سے رپورٹ ہوئے۔ واضح رہے کہ پيراگوائے، بوليويا اور ارجنٹائن کے جنگلات ميں بھی آگ لگنے کے واقعات تواتر سے جاری ہيں۔

ماہرين کے مطابق ايميزون ميں قدرتی طور پر آگ لگنے کے واقعات کم ہی پيش آتے ہيں۔ ايسے واقعات ميں عموماً انسانی ہاتھ ملوث ہوتا ہے۔ عام طور پر جنگلات کی زمين کو زراعت کے ليے صاف کرنے کے مقصد سے آگ لگائی جاتی ہے، جو اکثر قابو سے باہر ہو جاتی ہے۔ ايسے واقعات جولائی سے لے کر نومبر تک کے خشک موسم ميں زيادہ پيش آتے ہيں۔

فرانسیسی صدر ايمانوئل ماکروں نے ایمیزون کے علاقے میں اس آگ کو ایک بین الاقوامی بحران قرار دیا ہے۔ ان کا کہنا ہے کہ فرانس میں جی۔سیون کے سربراہان اس موضوع پر ہنگامی مشاورت کریں گے۔ برازیل کے صدر بولسونارو اور فرانس کے صدر ماکروں کے درمیان اس مسئلے سے نمٹے میں اختلافات کھل کر سامنے آئے ہیں اور دونوں کے درمیان سوشل میڈیا میں الزام تراشی بھی ہوئی۔

اس مسئلے پر دنيا کے کئی بڑے شہروں ميں لوگوں نے برازيل کے سفارت خانوں کے باہر احتجاج کيا ہے۔ ايسا ہی ايک بڑا احتجاجی مظاہرہ برطانوی دارالحکومت لندن ميں بھی کيا گيا۔