ایرانی صدارتی الیکشن: حسن روحانی کی واضح برتری

دبئی سے موصولہ رپورٹوں کے مطابق اعتدال پسند صدارتی امیدوار حسن روحانی کو حاصل ہونے والی برتری اس بات کا ثبوت ہے کہ ایرانی الیکشن کے نتائج اس حد تک حیران کن ہو سکتے ہیں کہ زیادہ مضبوط تصور کیے جانے والے سخت گیر انتخابی امیدواروں کے مقابلے میں ایک اعتدال پسند مذہبی شخصیت کامیاب ہو جائے۔

خبر رساں ادارے روئٹرز نے دبئی سے اس بارے میں اپنی رپورٹوں میں لکھا ہے کہ صدارتی الیکشن کا نتیجہ کچھ بھی ہو، اس ک‍ا ایران کے باقی ماندہ دنیا کے ساتھ تعلقات پر کوئی اثر نہیں پڑے گا۔ اس کے علاوہ اسلامی جمہوریہ ایران کی متنازعہ ایٹمی پالیسی اور اس کا بین الاقوامی سطح پر متنازعہ ایٹمی پروگرام بھی صدارتی الیکشن کے نتائج سے متاثر نہیں ہوں گے۔ ایران میں سلامتی سے متعلق ایسے تمام حساس معاملات میں حتمی فیصلہ سپریم لیڈر آیت اللہ علی خامنہ ای کرتے ہیں۔

پچھتر ملین کی آبادی والے ایران کے بارے میں اپنی ایک جائزہ رپورٹ میں خبر رساں ادارے روئٹرز نے لکھا ہے کہ انتخابات کے ابتدائی نتائج میں حسن روحانی کو حاصل ہونے والی واضح برتری اس بات کا ثبوت ہے کہ ایرانی معاشرے میں کافی حد تک اصلاحات پسندی کی خواہش پائی جاتی ہے۔

اس کے علاوہ بہت سے رائے دہندگان نے حسن روحانی کی حمایت کر کے ان سیاستدانوں کو مسترد کر دیا ہے، جو اپنی سخت گیر سوچ میں کسی لچک کا مظاہرہ نہیں کرتے اور جن کی وجہ سے ایران کے اقتصادی مسائل بھی اپنی جگہ ہیں اور اس کا بین الاقوامی سطح پر الگ تھلک ہو کر رہ جانا بھی۔

حسن روحانی ایران کے ایک سابق اعلٰی ترین جوہری مذاکراتی نمائندے ہیں، جو اپنی اعتدال پسندی اور مصالحت پسندانہ سوچ کی وجہ سے مشہور ہیں۔ وہ یہ اشارہ دے چکے ہیں کہ اپنی انتخابی کامیابی کی صورت میں وہ ایک ایسی خارجہ پالیسی کو رواج دیں گے، جس کی بنیاد باقی ماندہ دنیا کے ساتھ تعمیری اشتراک عمل پر ہوگی اور ساتھ ہی وہ داخلہ سیاست میں عملی طور پر شہری حقوق کا ایک چارٹر بھی متعارف کرائیں گے.

تہران سے موصولہ رپورٹوں کے مطابق کل جمعے کے الیکشن میں ڈالے گئے کل ووٹوں میں سے آج ہفتے کی شام تک 65 فیصد انتخابی مراکز پر ڈالے گئے ووٹوں کی گنتی مکمل ہو چکی تھی۔ ان ووٹوں میں سے حسن روحانی کو 51 فیصد سے زائد ووٹ حاصل ہو چکے ہیں۔

ایرانی وزارت داخلہ کے مطابق ہفتے کی شام تک گنے گئے کل 23 ملین سے زائد ووٹوں میں سے حسن روحانی کو ملنے والے ووٹوں کی تعداد 11.8 ملین کے قریب بنتی تھی۔

ij / mm (Reuters, AP)