ایران کو اپنا جوہری توانائی پلانٹ کیوں بند کرنا پڑا؟

ایران کے سرکاری ٹی وی نے 20 جون اتوار کے روز خبر دی کہ ملک کے واحد جوہری توانائی کے پلانٹ کو عارضی طور پر بند کر دیا گیا ہے۔ یہ پہلا موقع ہے جب ایران نے ہنگامی بنیادوں پر بو شہر نیو کلیئر پاور پلانٹ کو بند کرنے کی بات کہی ہو۔

حکام کا کیا کہنا ہے؟

 ایران میں توانائی کی معروف کمپنی توانیر سے وابستہ ایک سینیئر افسر نے ایک سرکاری ٹی چینل سے بات چیت میں کہا کہ جوہری پاور پلانٹ سنیچر کے روز بند کیا گیا تھا اور آئندہ تین سے چار روز تک یہ مزید بند رہے گا۔

انہوں نے کہا کہ بجلی کی عدم فراہم کی وجہ سے یہ پاور پلانٹ بند ہوا ہو گا۔  تاہم انہوں نے اس بات کی کوئی وضاحت نہیں پیش کی کہ اس جوہری توانائی کی تنصیب میں کس نوعیت کی تکنیکی مرمت کا کام جاری تھی اور آخر اس کے بند ہوجانے کی اصل وجہ کیا ہو سکتی ہے۔

پلانٹ کے بارے میں ہمیں مزید کیا معلوم ہے؟

یہ جوہری توانائی پلانٹ ایران کے جنوبی ساحلی شہر بو شہر میں واقع ہے جس کی تعمیر کا کام سن 1970 میں شروع ہوا تھا۔ بعد میں روس کی مدد سے اس کی تعمیر مکمل ہوئی تھی اور سن 2011 میں اس نے کام کرنا شروع کیا۔

جوہری عدم پھیلاؤ کے معاہدے کے تحت، پلانٹ کو بجلی بنانے کے لیے استعمال میں آنے والا یورینیم روس میں تیار کیا جاتا ہے۔ اس معاہدے کے تحت جو بھی یورینیم ایندھن استعمال ہوتا ہے اس کے فضلہ کو بھی روس کو واپس بھیجنے کی ذمہ داری ایران پر عائد ہوتی ہے۔ تاہم

 امریکی پابندیوں کی وجہ سے، ایران کو روس سے اس پلانٹ کے لیے دیگر ساز و سامان اور ٹیکنالوجی حاصل نہیں ہو پا رہی ہے۔

گزشتہ مارچ میں ملک کے جوہری سائنسدان محمد جعفری نے اس پلانٹ سے متعلق یہ کہتے ہوئے تشویش کا اظہار کیا تھا کہ یہ کام کرنا بند کر سکتا ہے۔ یہ جوہری توانائی پلانٹ اقوام متحدہ کے جوہری نگراں آئی اے ای اے کی نگرانی میں کام کرتا ہے۔

ص ز/ ج ا (اے پی، روئٹرز)