’ایران اپنی فورسز پاکستانی علاقے میں بھیج سکتا ہے‘

آج پیر کے روز خبر رساں ادارے ایسوسی ایٹڈ پریس کی تہران سے ملنے والی رپورٹوں کے مطابق عبدالرضا رحمانی فاضلی کا یہ بیان ایران کے سرکاری ٹیلی وژن ادارے سے نشر ہوا ہے اور اس کا پس منظر ان ایرانی بارڈر گارڈز کا اغوا ہے جن کی تعداد پانچ ہے۔

ایران اور پاکستان کے درمیان سرحدی علاقے میں فعال عسکریت پسندوں کے ایک قدرے کم معروف گروپ جیش العدل نے قریب ایک ہفتہ قبل سوشل نیٹ ورکنگ ویب سائٹ ٹوئٹر پر ان پانچ ایرانی سرحدی محافظین کی تصویریں پوسٹ کر کے یہ بھی لکھ دیا تھا کہ اس گروپ کے ارکان نے ان بارڈر گارڈز کو پاکستان کے ساتھ بین الاقوامی سرحد کے قریب ایرانی علاقے سے اغواء کیا تھا۔

وزیر داخلہ رحمانی فاضلی کے ٹیلی وژن پر نشر کردہ بیان کے مطابق ایران نے پاکستانی حکومت سے کہہ دیا ہے کہ وہ اس معاملے کو ’پوری طاقت اور سنجیدگی‘ کے ساتھ حل کرے۔ دوسری صورت میں ایران کو اس دور دراز علاقے کو محفوظ بنانے کی اجازت دی جانا چاہیے، جو ’سرحد پار پاکستانی اور افغان سرزمین پر کافی اندر تک‘ پھیلا ہوا ہے۔ داخلہ امور کے ایرانی وزیر نے مزید کہا، ’’اگر ایسا نہ ہوا تو تہران حکومت اس بات کو اپنا حق سمجھتی ہے کہ وہ مداخلت کرے اور اپنی حفاظت کے لیے ایک نیا سکیورٹی دائرہء کار تشکیل دے۔‘‘

اسی دوران ایران کے پریس ٹی وی نے اپنی ویب سائٹ پر کہا ہے کہ وزیر داخلہ رحمانی فاضلی نے ایرانی بارڈ گارڈز کے پانچ ارکان کے حالیہ اغواء کے واقعے کا ذمے دار پاکستان کو ٹھہرایا ہے اور کہا ہے کہ اس سلسلے میں پاکستانی حکام کو ایران کو جواب دینا ہو گا۔

ان ایرانی سرحدی محافظین کو چھ فروری کو ایرانی صوبے سیستان بلوچستان کے علاقے جاکی گُور سے اغواء کیا گیا تھا اور پھر مبینہ طور پر مسلح اغواء کار انہیں سرحد پار پاکستانی علاقے میں لے گئے تھے۔ اس واقعے کی ذمے داری جیش العدل نامی مسلح گروپ نے قبول کر لی تھی، جسے ایرانی حکام ایک ’دہشت گرد گروہ‘ قرار دیتے ہیں۔

وزیر داخلہ رحمانی فاضلی کے بقول اس سلسلے میں تہران متعینہ پاکستانی سفیر نور محمد جادمانی کو بھی تہران حکومت کے شدید اعتراضات سے آگاہ کر دیا گیا ہے اور عنقریب ہی اسی حوالے سے ایران کا ایک سرکاری وفد پاکستان کا دورہ بھی کرے گا۔

گزشتہ برس اکتوبر میں بھی اسی عسکریت پسند گروپ کے ارکان نے پاکستانی سرحد کے قریب ایرانی علاقے میں ایک بڑا حملہ کر کے 14 سرحدی محافظین کو ہلاک اور چھ دیگر کو زخمی کر دیا تھا۔ اس سے پہلے فروری 2013ء میں پاکستان اور ایران نے ایک ایسے سکیورٹی معاہدے پر دستخط کیے تھے، جس کے تحت دونوں ہمسایہ ملک دہشت گردی اور قومی سلامتی کے خطرات کا مقابلہ کرنے کے ساتھ ساتھ منظم جرائم کی روک تھام کے لیے بھی ایک دوسرے سے تعاون کے پابند ہیں۔

ایرانی پریس ٹی وی کے مطابق تہران حکومت کئی بار پاکستان سے مطالبہ کر چکی ہے کہ وہ اس معاہدے کی شرائط پر عمل کرے۔