ایبولا کے سائے میں مناسک حج کی ادائیگی شروع

اس برس حج کے موقع پر مغربی افریقہ سے پھوٹنے والی ایبولا وائرس کی وباء کے خوف کے پیش نظر سعودی حکام نے خصوصی انتظامات کیے ہیں۔ خبر رساں ادارے روئٹرز نے مکہ سے موصولہ اطلاعات کے حوالے سے بتایا ہے کہ بالخصوص مغربی افریقی ممالک سے حج کی ادائیگی کے لیے آنے والے افراد کے خصوصی نگرانی کی جا رہی ہے اور اس سلسلے میں موبائل لیباٹریاں بھی حرکت میں ہیں۔ بتایا گیا ہے کہ مہلک وائرس ایبولا میں مبتلا ہونے کے شک میں فوری طور پر ٹیسٹ کرنے کا انتظام بھی کیا گیا ہے۔

سعودی حکومت نے بتایا ہے کہ اس برس تین ملین مسلمان حج ادا کریں گے، جن میں 1.4 ملین افراد بیرون ممالک سے وہاں پہنچے ہوئے ہیں۔ جمعرات کے دن سعودی وزارت صحت نے بتایا ہے کہ وہ ایبولا وائراس کے ممکنہ پھیلاؤ کو روکنے کے لیے عالمی ادارہ صحت (ڈبلیو ایچ او) اور امریکی طبی حکام سے مسلسل رابطے میں ہیں۔ ڈبلیو ایچ او کے اعداد و شمار کے مطابق ایبولا وائراس کے نتیجے میں کم ازکم تین ہزار 300 افراد ہلاک ہو چکے ہیں جبکہ یہ وباء تیزی سے پھیل رہی ہے۔

مکہ میں مسجد الحرام کے باہر موجود نائجیریا کے ایک ڈاکٹر عبدالصمد نے روئٹرز کو بتایا، ’’ہم حج کی ادائیگی کے لیے لاگوس سے آئے ہیں۔ وہاں بھی ہمارا مکمل ٹیسٹ ہوا تھا اور یہاں سعودی عرب پہنچنے پر بھی ہمارا طبی معائنہ کیا گیا۔ ابھی تک ہمیں یقین ہے کہ ایبولا کا کوئی خطرہ نہیں ہے۔‘‘ خانہ کعبہ میں موجود احرام زیب تن کیے ہوئے لوگوں میں بھی ایسے افراد انتہائی کم ہیں، جنہوں نے اییولا کے وائرس سے بچنے کے لیے خصوصی ماسک اور دستانے پہن رکھے ہیں۔

مصر سے تعلق رکھنے والے اکہتر سالہ بزرگ اسماعیل صالح کا کہنا ہے کہ اس ’مقدس مقام‘ پر مرنا میرا خواب ہے، ’’میں نے یہاں حاضری دینے کے لیے تمام عمر انتظار کیا ہے اور میں ایمانداری سے کہتا ہوں کہ میں یہاں ہی مرنا چاہتا ہوں۔ اس لیے ایبولا وائرس میں مبتلا ہونا میرے لیے خوف کی بات نہیں ہے کیونکہ آپ دیکھ سکتے ہیں کہ میں پہلے سے ہی وہیل چیئر پر موجود ہوں۔‘‘

دوسری طرف ایسے لوگ بھی ہیں جو مسلمانوں کے سے سب سے بڑے اجتماع کے دوران کسی بیماری میں مبتلا ہونے سے خوفزدہ ہیں۔ پاکستان سے تعلق رکھنے والی چار بچوں کی ماں روبینہ فہیم کا کہنا ہے، ’’ میں میرس یا ایبولا کے وائرس میں مبتلا ہونا برداشت نہیں کرسکتی۔ مجھے اپنے کنبے کی دیکھ بھال کرنا ہے۔‘‘ سعودی حکام کے مطابق حج کے دوران کسی ہنگامی صورتحال سے نمٹنے کے لیے بائیس ہزار طبی اہلکار تعینات کیے گئے ہیں۔ گزشتہ برس اس مقصد کے لیے بارہ ہزار طبی اہلکار مامور تھے۔

یہ امر اہم ہے کہ سعودی عرب نے پہلے ہی ایسے ممالک کو اس مرتبہ حج کرنے کے لیے منع کر دیا تھا جن کا تعلق سیرالیون، گنی یا لائبیریا سے تھا۔ ایبولا وائرس انہی تین مغربی افریقہ ممالک س پھیلنا شروع ہوا تھا۔ سعودی حکام کے مطابق احتیاطی طور پر ان ممالک کے افراد کو پہلے ہی انکار کر دیا گیا تھا کہ وہ ویزے کے لیے درخواست جمع نہ کرائیں۔ تاہم اقوام متحدہ کے مطابق ان ممالک سے سات ہزار مسلمانوں نے حج ادا کرنے کی غرض سے ویزا فارم جمع کرائے تھے۔