انڈونیشیا میں ہزارہ مہاجرین نے ’مایوسی‘ کا حل تلاش کرلیا

انڈونیشیا کے دارالحکومت جکارتہ میں  ہزارہ برادری سے تعلق رکھنے والے کے چند مہاجرین نے صحت، تعلیم اور تربیت کے ایک پروگرام ’ہیلپ‘ کا آغاز کیا۔ ’ہیلپ‘ HELP'' پروگرام کا مقصد ایسے تارکین وطن کی حوصلہ افزائی کرنا تھا جو دن بھر اپنے گھروں میں فارغ بیٹھے رہتے تھے اور صرف اپنے ماضی کو یاد رکھتے تھے۔ 

ہزارہ برادری کی ہلاکتیں ’نسل کشی‘ ہے، ثاقب نثار

امن کے لیے اسلام کی ’نئی تشریح‘ ضروری: انڈونیشی عالم دین

’ہیلپ‘ سکول میں ایک سو سے زائد تارکین وطن طلبہ تعلیم حاصل کررہے ہیں۔ صبح کے وقت یہاں بچوں اور نوجوانوں کو انگریزی، ریاضی، فنون و سائنس کے ساتھ سماجی علوم کے مضامین بھی پڑھائے جاتے ہیں۔ جب کہ بالغ تارکین وطن کے لیے شام کو انگریزی اور انڈونیشین زبان سمیت مختلف زبانیں سکھائی جاتی ہیں۔ اس پروگرام کے بانی، افغانستان کی ہزارہ برادری سے تعلق رکھنے والے باقر کا کہنا ہے کہ یہ منصوبہ انڈونیشیا میں مقیم مہاجرین کو زندگی میں نئی امید دکھاتا ہے، تاکہ وہ گھر سے نکلیں اور کچھ نیا اور مثبت کام سیکھ سکیں خواہ پھر وہ تعلیم ہو یا کوئی ہُنر۔ منصوبے کو عملی جامع پہنانے میں باقر کےساتھ چند کاروباری اشخاص نے بھی کلیدی کردار ادا کیا۔

’رفیوجی وومین سپورٹ گروپ‘

جکارتہ سے ستر کلومیٹر کے فاصلے پر پاکستانی ہزارہ برادری سے تعلق رکھنے والی کلثوم جعفری تارکین وطن خواتین کو ہیلتھ ورکشاپ، انگریزی کلاس، اور سلائی سکھانے کا سینٹر چلاتی ہیں۔ کلثوم نے سن 2013 میں یہاں سربند اور پرس بنانے کا سلسلہ شروع کیا تھا۔ اب ’رفیوجی وومین سپورٹ گروپ‘ میں خواتین خود سلائی مشینوں پر ملبوسات تیار کرتی ہیں۔ قبل ازیں کلثوم نے ایک آسٹریلوی پی ایچ ڈی ریسرچر کے ساتھ  مل کر مہاجر خواتین کے ہاتھوں سے تیار کردہ ملبوسات اور بیگ کا ’آن لائن برانڈ‘ بھی شروع کیا تھا۔

انڈونیشیا میں تقریباﹰ تیرہ ہزار آٹھ سو پناہ کے متلاشی افراد موجود ہیں۔ ان پناہ گزینوں کے حقوق محدود ہیں۔ پناہ گزینوں کو نہ تو تعلیمی اداروں تک رسائی حاصل ہے اور نہ ہی کام کرنے اجازت۔ ماضی میں انڈونیشیا میں مہاجرین کوایک مخصوص مدت کے لیے رہنے کی اجازت دی جاتی تھی جس کے بعد انہیں کسی ایسے ملک منتقل کر دیا جاتا تھا جہاں وہ ’محفوظ اور بہتر زندگی‘ بسر کرسکیں۔ تاہم گزشتہ چند برسوں کے دوران حالات تبدیل ہو چکے ہیں اور اقوام متحدہ کے ادارہ برائے مہاجرین نے سن 2017 میں یہاں بسنے والے مہاجرین کو آگاہ کر دیا تھا کہ اب ’ان کی کسی دوسرے ملک منتقلی ممکن نہیں ہے‘۔

ع آ / ش ح ،  (ہاروے جمیما، انڈونیشیا)