’انتھونی فاؤچی ایک تباہی ہیں‘ ڈونلڈ ٹرمپ

 

میڈیا رپورٹس کے مطابق ٹرمپ نے پیر کو اپنی انتخابی مہم کی ٹیم کے ساتھ فون پر گفتگو میں فاؤچی پرسخت تنقید کی تھی۔ نیویارک ٹائمز کی ایک رپورٹ  میں کہا گیا کہ صدر ٹرمپ نے اپنی گفتگو میں کہا، ''جب فاؤچی ٹیلی ویژن پر نمودار ہوتے ہیں تو ہمیشہ کوئی نا کوئی ایسی بات کرتے ہیں کہ جو ایک بم  کی مانند ہوتی ہے لیکن جب آپ انہیں فائر کردیں تو اُس سے بھی بڑا بم گرتا ہے۔ فاؤچی ایک تباہی ہیں۔‘‘

صدر ٹرمپ نے اپنے حامیوں سے مزید کہا، ’’لوگ فاؤچی اور ان جیسے بیوقوفوں کو سنتے سنتے تنگ آچکے ہیں ، یہ تمام احمق ہیں جنہوں نے غلطیاں کی ہیں۔‘‘

ٹرمپ جنہیں احمق کہہ رہے ہیں وہ کون ہے؟

انتھونی فاؤچی امریکا کے متعدی بیماریوں کے قومی ادارے کے ڈائریکٹر ہیں اور دراصل وائٹ ہاؤس کے کورونا وائرس ورکنگ گروپ کا حصہ ہیں۔ ایک طرف امریکی صدر ڈونلڈ ٹرمپ کورونا بحران سے نمٹنے کے لیے اپنے طرز عمل اور حکمت عملی کی وجہ سے بے حد تنقید کا نشانہ بن رہے ہیں اور خود کورونا وائرس کا شکار بھی ہو چُکے ہیں،  دوسری جانب وبائی امراض کے ماہر انتھونی فاؤچی  امریکا اور بین الاقوامی سطح پر ایک ڈاکٹر کی حیثیت سے بہت اچھی شہرت کے حامل ہیں۔

دلچسپ امر یہ کہ ٹرمپ کی فاؤچی پر تنقید  خود ان کی اپنی ریپبلکن پارٹی کے اراکین کی برہمی کا سبب بنی۔ امریکی سینٹ کی ہیلتھ کمیٹی کے سربراہ لامار الیگزینڈر نے ایک ٹویٹ میں تحریر کیا کہ فاؤچی اب تک اس کمیٹی کے سب سے معتبر اور معزز اہلکار رہ چُکے ہیں اور یہ چھ امریکی صدور کی سربراہی میں کام کر چُکے ہیں۔ فاؤچی کے مشوروں پر عمل کر کے ہم امریکا سے کووڈ انیس کے کیسز کی امریکا میں تعداد کم کر سکتے ہیں۔

ڈونلڈ ٹرمپ کے ڈیموکریٹک حریف کیا کہتے ہیں؟

ٹرمپ کے مد مقابل ڈیموکریٹک لیڈرجو بائیڈن کی انتخابی ٹیم نے ٹرمپ کی طرف سے سائنسدانوں کی 'ایک نہ سننے‘ کی روش کو  سخت تنقید  کا نشانہ بنایا جس سے وبائی امراض کے پھیلاؤ اور امریکا میں کووڈ انیس کا شکار ہو کر ہلاک ہونے والوں کی تعداد کے تناظر میں یہ ملک دنیا کا سب سے زیادہ متاثرہ ملک بن گیا۔

 

ٹرمپ نے ان  بیانات کی تردید نہیں کی۔ ٹویٹر پرانہوں نے فاؤچی  کا حوالہ دیتے ہوئے لکھا، ’’ٹونی سے میں صرف اتنا مطالبہ کرتا ہوں کہ وہ بہتر فیصلے کریں۔‘‘

ریاست ایریزونا کے مرکزی شہر فینکس میں ایک انتخابی مہم کے دوران  ٹرمپ نے فاؤچی کے بارے میں کہا، ''بعض اوقات وہ ایسی باتیں کہتے ہیں جو تھوڑا سا حقیقت سے دور اور اداس کر دینے والی اور دکھ کی بات ہوتی ہے ، لیکن وہ ایک اچھے انسان ہیں میں انہیں پسند کرتا ہوں۔‘‘

ریپبلکن لیڈر ٹرمپ نے یہ سب کچھ امیونولوجسٹ کا طویل کیریئر رکھنے والے فاؤچی کا حوالہ دیتے ہوئے کہا۔ ٹرمپ کا یہ بھی کہنا تھا، ''میں انہیں تکلیف نہیں دینا چاہتا ، وہ کئی دہائیوں سےکام کر رہے ہیں ہے۔‘‘

سخت غصہ

گزشتہ اتوار کو امریکی ٹی وی چینل سی بی ایس پر اپنے خیالات کا اظہار کرتے ہوئے فاؤچی کا کہنا تھا، ''مجھے بالکل حیرت نہیں ہوئی تھی جب یہ خبر عام ہوئی کہ ڈونلڈ ٹرمپ کورونا وائرس کا شکار ہوئے ہیں۔ گزشتہ ماہ کے اوآخر میں ٹرمپ نے وائٹ ہاؤس کے روز گارڈن میں سپریم کورٹ کی جج کے انتخاب کے سلسلے میں ایک شاندار تقریب منعقد کی۔ میںنے ٹیلی وژن پر اس تقریب کو دیکھا گیا جس میں کہیں دور دور تک بھی کورونا سے متعلق احتیاطی تدابیر اور ضوابط کا اطلاق نظر نہیں آیا۔ میں اُسی وقت سمجھ گیا تھا کہ اس کے کوئی اچھے نتائج سامنے نہیں آئیں گے۔‘‘

 فاؤچی نے تاہم ایک بار پھر اس امر پر سخت ناراضگی کا اظہار کیا کہ ٹرمپ کی انتخابی مہم کے لیے سرگرم ٹیم نے ایک انتخابی کمرشل میں اُن کی اجازت کے بغیر ان کے ایک بیان کو توڑ مروڑ کر انتہائی گمراہ کُن انداز میں استعمال کیا۔ اس پر فاؤچی حقیقی معنوں میں ناراض ہیں۔

ک م/ ع ت/ ڈی پی اے، رائٹرز، اے پی