افریقی مہاجرین کو ہم خود نکالیں گے، نیتن یاہو

اسرائیلی وزیر اعظم بینجمن نیتن یاہو نے بتایا کہ انہوں نے گزشتہ چوبیس گھنٹوں کے دوران اس بارے میں ملکی وزیر داخلہ اور شہری نمائندوں سے بات کرنے کے بعد معاہدے کو منسوخ کرنے کا فیصلہ کیا ہے۔ انہوں نے مزید کہا کہ ان کی حکومت غیر قانونی طریقے سے اسرائیل میں داخل ہونے والوں کو بے دخل کرنے کی اپنی کوششیں جاری رکھے گی۔

اسرائیلی  وزیر اعظم نے ابھی گزشتہ روز ہی اس حوالے سے بتایا تھا کہ اس معاہدےکی رو سے افریقی ممالک سے تعلق رکھنے والے سولہ ہزار سے زائد تارکین وطن کو کینیڈا، جرمنی اور اٹلی سمیت دیگر مغربی ممالک میں منتقل کیا جائے گا، ''اس معاہدے کے بعد ہمیں اجازت مل گئی ہے کہ اسرائیل سولہ ہزار سے زائد مہاجرین کو ترقی یافتہ ممالک بھیج سکتا ہے۔‘‘ ان میں سے زیادہ تر کا تعلق سوڈان اور اریٹیریا سے ہے۔

اسرائیل افریقی تارکین وطن کو مغربی ممالک میں بسائے گا

افریقی مہاجرین دو ماہ میں اسرائیل چھوڑ دیں، نوٹس جاری

اس سے قبل تل ابیب حکومت ان تارکین وطن کو کسی نا معلوم افریقی ملک بھیجنا چاہتی تھی اور ان کی جگہ نئے مہاجرین کو اسرائیل میں بسانے کا منصوبہ بنایا گیا تھا۔ تاہم اس منصوبے پر کڑی تنقید کی گئی تھی، جس کے بعد یہ متنازعہ بن گیا تھا۔ نیتن یاہو نے جنوری میں اسرائیل میں غیر قانونی طریقے سے داخل ہونے والوں سے کہا تھا کہ ان کے پاس دو راستے ہیں، ایک یا تو وہ خود رضاکارانہ طور پر ملک چھوڑ دیں یا پھر طویل قید کے لیے تیار ہو جائیں، جس کے بعد بھی انہیں ملک بدر کر دیا جائے گا۔

 اسرائیل میں رہائش پذیر افریقی ممالک سے تعلق رکھنے والے زیادہ تر افراد انتہائی غریب علاقوں میں رہتے ہیں۔ ان تارکین وطن اور مقامی آبادی کے مابین اکثر کشیدگی کی خبریں سامنے آتی ہیں۔ اس سلسلے میں ابھی حال ہی میں تل ابیب کے شہریوں کی جانب سے شدید تقید سامنے آئی تھی۔