اسکرٹ پہننے پر قید کی سزا

ایک طالبہ اور ایک ہیئرڈریسر جنوبی مراکش کے ایک ساحلی شہر اکادیر کی ایک مارکیٹ میں کیا نکلیں کہ ملک بھر میں ایک سیاسی بحث چھڑ گئی اور انہیں عدالت میں طلب کر لیا گیا ۔ وجہ یہ تھی کہ ان دونوں نوجوان لڑکیوں نے اسکرٹ پہن رکھی تھی جو ’مردوں کو لُبھانے‘ کا سبب بن سکتی تھی۔ اسکرٹ میں ملبوس یہ دونوں لڑکیاں جس بازار سے گزر رہی تھیں وہاں مردوں نے اُن پر آوازیں کسنا شروع کیں اور انہیں اشتعال انگیز لباس پہننے پر کڑی تنقید کا نشانہ بنایا۔ معاملہ مراکش کے سلامتی کے ادارے تک پہنچا۔ پولیس وقوعہ تک پہنچی اور اُس نے دونوں خواتین کو گرفتار کر لیا۔

’نری بے حیائی‘

یہ واقعہ ہے 16 جون کا یعنی مسلمانوں کے مقدس مہنے رمضان کا۔ شاید یہی وجہ بنی ان خواتین کی گرفتاری اور انہیں عدالت کےکٹہرے میں پیش ہونے کی۔ انیس اور تیئیس سالہ ان نوجوان خواتین کے خلاف جو فرد جرم عائد کی گئی ہے اُس کی وجہ ’ تنگ لباس پہننا‘ بتائی گئی ہے، جو مراکش کے قوانین کے تحت ’بے حیائی‘ کے زمرے میں آتی ہے اور قدامت پسند مسلم بادشاہت مراکش کے کرمنل کوڈ یا ضابطہ فوجداری کے تحت تنگ لباس پہننے کر گھروں سے نکلنے کا عمل ’ سرے عام فحاشی‘ ہے۔ اس کی سزا دو ماہ سے لے کر دو سال تک کی قید ہو سکتی ہے۔

انصاف کے خلاف مظاہرے

’سرے عام فحاشی‘ کے جرم کی مرتکب ان دونوں نوجوان خواتین کے خلاف مقدمے کی عدالتی کارروائی گزشتۃ پیر کو شروع ہوئی۔ اس موقع پر مراکش کے دارالحکومت رباط کی سڑکوں پر سینکڑوں مراکشی خواتین اور مردوں نے مظاہرے کیے۔ مشتعل مظاہرین انصاف کے ادارے کے خلاف نعرے لگا رہے تھے۔ اگلے روز کاسابلانکا اور اکادیر میں بھی احتجاجی ریلی کی کال دی گئی۔

مراکش کے آئین کی روشنی میں مرد اور عورت مساوی ہیں۔ یہ شمالی افریقی ملک مغربی دنیا سے اپنی جغرافیا‍ئی قربت پر خوشی محسوس کرتا ہے۔ اس ملک میں جنسیت کا موضوع شجر ممنوع ہے اور اس کا آغاز ننگی جلد ہی سے ہو جاتا ہے۔ وہاں ہم جنس پرستی، شادی سے پہلے جنسی تعلق اور اسقاط حمل جیسے موضوعات کے بارے میں عوامی سطح پر مکمل خاموشی پائی جاتی ہے۔

شجر ممنوعہ پر عوامی بحث

مراکش کی سڑکوں پر نکل کر احتجاج کرنے والے انسانی حقوق کے سرگرم مرد و خواتین نے اس ممنوعہ موضوع کو سوشل نیٹ ورک پر عام کر کہ اس بارے میں عوامی بحث چھیڑ دی ہے۔

ٹوئٹر پر ایک ہی پیغام گردش کر رہا ہے، ’کسی لباس کو زیب تن کرنا کوئی قابل سزا جرم نہیں ہے‘۔ اُدھر مراکشی خواتین شارٹس میں ملبوس ہو کر اپنی تصاویر بنوا کر سوشل میڈیا پر شائع کر رہی ہیں۔

جرمنی ہاٹ پینٹس پر پابندی

عورتوں کا تنگ اور چست لباس پہننا محض مسلم معاشروں میں ہی اشتعال انگیزی کا باعث نہیں بلکہ مغرب کی آزاد جمہوری ریاست جرمنی میں بھی اس کی ایک مثال سامنے پئی ہے۔ حال ہی میں جرمن صوبے بادن وورٹمبرگ کے ایک سیکنڈری اسکول میں ایک طالبہ کے ہاٹ پینٹس پہننے پر پابندی عائد کر دی گئی۔ اسکول انتظامیہ نے اس طالبہ کے والدین کو باقاعدہ خط بھیجا جس میں اُن کی بیٹی کے ہاٹ پینٹس پہننے پراعترض کیا گیا اورانہیں مطلع کیا گیا کہ ہاٹ پینٹس پہننے پر پابندی عائد کی جا رہی ہے۔ اس کے بعد سے جرمنی میں بھی خواتین کے لباس پر پابندی کا موضوع سوشل میڈیا کی سرگرمیوں میں مزید اضافے کا سبب بن گیا ہے۔