اسلام آباد میں تصادم جاری، دو افراد ہلاک

خبر رساں ادارے اے ایف پی کی رپورٹوں کے مطابق پاکستان کی وفاقی حکومت نے کہا ہے کہ وہ شدید بدامنی کے ان واقعات کے بعد بھی اپوزیشن جماعتوں تحریک انصاف اور عوامی تحریک کے ساتھ دوبارہ مذاکرات کے آغاز کی کوششیں کر رہی ہے جبکہ وزیر اعظم ہاؤس کے باہر پرتشدد احتجاج اور سکیورٹی فورسز کی کارروائیوں کے دوران کم از کم دو افراد مارے جا چکے ہیں۔

اسی دوران ایسوسی ایٹڈ پریس نے لکھا ہے کہ اب تک صرف ایک احتجاجی کارکن ہلاک ہوا ہے، جس کا نام پاکستانی ذرائع ابلاغ کی طرف سے گلفام عادل بتایا جا رہا ہے۔ یہ اپوزیشن کارکن کل رات پولیس کی طرف سے کی جانے والی آنسو گیس کی شیلنگ اور ربر کی گولیوں سے فائرنگ میں زخمی ہو گیا تھا، جو آج اتوار کی صبح اسلام آباد کے PIMS ہسپتال میں انتقال کر گیا۔

پاکستانی وزیر اطلاعات پرویز رشید نے آج کہا کہ وفاقی حکومت موجودہ پریشان کن صورت حال کے پرامن خاتمے کے لیے عوامی تحریک اور تحریک انصاف کے ساتھ اپنے مذاکرات دوبارہ شروع کرنے پر تیار ہے۔ پرویز رشید نے نجی ٹیلی وژن چینل جیو نیوز کے ساتھ بات چیت کرتے ہوئے کہا، ’’یہ تصادم حکومت نے شروع نہیں کیا۔ مظاہرین خود پرتشدد ہو گئے تھے۔ انہوں نے حساس حکومتی عمارات میں داخلے کی کوشش کی۔ ایسی عمارات جو ریاست کی علامت ہیں۔‘‘ پرویز رشید نے دعویٰ کیا کہ مظاہرین چاہتے تھے کہ ان کے مطالبات کو گن پوائنٹ پر تسلیم کیا جائے۔ ’’پھر بھی ہمارے دروازے بات چیت کے لیے کھلے ہیں۔‘‘

جھڑپیں اتوار کی صبح بھی جاری

اے ایف پی نے اپنی رپورٹوں میں لکھا ہے کہ اسلام آباد کی شاہراہ دستور پر پولیس اہلکاروں کی عمران خان کی تحریک انصاف اور طاہر القادری کی عوامی تحریک کے مشتعل کارکنوں کے ساتھ وقفے وقفے سے ہونے والی جھڑپیں آج اتوار کی صبح بھی جاری رہیں۔ ان مظاہرین کی تعداد چند سو بتائی گئی ہے جن میں سے بہت سے لاٹھیوں سے مسلح ہیں۔ اس کے علاوہ اسی علاقے میں رات بھر جاری رہنے والی بدامنی کے بعد ہزاروں کی تعداد میں احتجاجی کارکن، جنہیں شدید نوعیت کی آنسو گیس شیلنگ کا سامنا بھی کرنا پڑا، ابھی تک وہاں زمین پر لیٹے ہوئے ہیں یا سو رہے ہیں۔ دیگر رپورٹوں کے مطابق اسلام آباد کی شاہراہ دستور پر گزشتہ بارہ گھنٹوں کے دوران پولیس کے کئی ٹرکوں سمیت بہت سی گاڑیوں کو آگ لگا دی گئی۔

پاکستان انسٹیٹیوٹ آف میڈیکل سائنسز (PIMS) کے ذرائع نے بتایا ہے کہ کل رات سے اب تک ان مظاہروں کے دوران دو افراد ہلاک ہو چکے ہیں۔ ان میں سے ایک وہ شخص تھا جو ربر کی گولیوں سے فائرنگ میں زخمی ہو گیا تھا جبکہ دوسرے شخص کی موت دل کا دورہ پڑنے سے ہوئی۔

تازہ رپورٹوں کے مطابق اسلام آباد میں اہم ترین ریاستی اداروں والے علاقے میں اس بدامنی کے دوران جو مظاہرین زخمی ہوئے، ان کی تعداد 290 سے لے کر 480 تک بتائی جا رہی ہے۔ ان میں درجنوں خواتین اور چند بچے بھی شامل ہیں، جنہیں علاج کے لیے شہر کے دو بڑے ہسپتالوں میں پہنچا دیا گیا۔ زخمیوں میں کم از کم 79 پولیس اہلکار بھی شامل ہیں۔