آسٹریا کے نائب چانسلر کی ویڈیو، ’روس سے مدد مانگ رہے ہیں‘

جرمن اخبار زوڈ ڈوئچے سائٹنگ اور ڈیئر اشپیگل نامی جریدے کے مطابق انہوں نے انتہائی دائیں بازو کے نظریات کے حامل آسٹریا کے نائب چانسلر ہائنز کرسٹیان اشٹراخے کی وہ خیفہ ویڈیو دیکھی ہے، جس میں وہ الیونا ماکارووا نامی ایک روسی خاتون کو کاروباری معاہدوں کی پیشکش کر رہے ہیں۔ اس ویڈیو میں یہ روسی خاتون خود کو کسی اعلیٰ روسی حکومتی عہدیدار کی رشتے دار بتا رہی ہے اور ساتھ ہی آسٹریا میں کئی ملین یورو کی سرمایہ کاری کی اپنی خواہش کا اظہار کر رہی ہیں۔

کرسٹیان اشٹراخے کا تعلق عوامیت پسند فریڈم پارٹی (ایف پی او) سے ہے۔ یہ ویڈیو جولائی 2017ء میں ہسپانوی جزیرے ایبیزا میں بنائی گئی ہے۔ اس میں اشٹراخے اور ان کی پارٹی کے یوہان گوڈینس دکھائی دے رہے ہیں اور یہ لوگ آسٹریا کے  معروف اور بااثر ترین اخبار ’کرونن سائٹنگ‘ کے حقوق اس روسی خاتون کو فروخت کرنے کی بات کر رہے ہیں۔

ویڈیو میں الیونا ماکارووا  کہہ رہی ہیں کہ وہ بہت پیسے والی ہیں اور وہ کرونن سائٹنگ کے شیئرز خریدنا چاہتی ہے۔ وہ کہہ رہی ہیں کہ وہ اس لیے اس اخبار میں دلچسپی لے رہی ہیں تاکہ انتخابات کے دوران اشٹراخے کی جماعت (ایف پی او) کی بہتر طور پر تشہیر کی جا سکی۔ جواب میں اس خاتون نے سیاسی فوائد طلب کیے ہیں۔

آسٹریا کے نائب چانسلر اس خاتون کو بتا رہے ہیں کہ اگر ان کی جماعت انتخابات جیتی ہے تو سرکاری ٹھیکے ان کی تجویز کردہ کمپنیوں کو دیے جائیں گے۔

خبر رساں اداروں ’ڈی پی اے‘ اور ’اے پی اے‘ نے آسٹریا کی مخلوط حکومت کے ذرائع کے حوالے سے بتایا ہے کہ چانسلر سیباستیان کرس نے اعلان کیا ہے کہ وہ اشٹراخے کے ساتھ مزید کام نہیں کریں گے۔ تاہم اس خبر کی تصدیق آج کرز کی جانب سے پریس کانفرنس میں کی جائے گی۔

اس ویڈیو میں اشٹراخے بار بار کہہ رہے ہیں کہ وہ آسٹریا میں ذرائع ابلاغ کو بالکل اس طرح سے تبدیل کرنا چاہتے ہیں جیسے ہنگری کے دائیں بازو کے وزیر اعظم وکٹور اوربان نے کیا ہے۔ ہنگری میں آج کل حکومت پر تنقید کرنے والا شاید ہی کوئی بھی میڈیا ہاؤس موجود ہو۔ ڈیئر شپیگل کے مطابق یہ ویڈیو ان سیاستدانوں کو جال میں پھنسانے کی ایک سازش دکھائی دیتی ہے۔