2013ء میں ’سیلفی‘ کا رجحان رہا

دنیا میں سیلفی پورٹریٹ کا سلسلہ کیمرے کی ایجاد کے ساتھ ہی شروع ہو گیا تھا۔ تاہم اسمارٹ فونز کے متعارف ہونے کے بعد یہ ایک عام سی بات بن گئی ہے۔اس لفظ کی شہرت کا اندازہ اس بات سے لگایا جا سکتا ہے کہ آکسفورڈ انگلش ڈکشنری نے اسے سال 2013ء کا ’ورڈ آف دی ایئر‘ قرار دیا ہے۔ آکسفورڈ یونیورسٹی کے مطابق کیمرے، اسمارٹ فون یا ویب کیم سے اتاری گئی وہ تصاویر، جنہیں کسی بھی سماجی ویب سائٹ پر پوسٹ کیا گیا ہو، سیلفی کہلاتی ہیں۔

انٹرنیٹ ویب سائٹ ’یاہو‘ نے اندازہ لگایا ہے کہ 2014ء کے دوران تقریباً 880 ارب تصاویر لی جائیں گی۔ اس کا مطلب یہ کہ دنیا کے ہر انسان کی اوسطاً 123 تصاویر ہوں گی اور ان میں سے زیادہ تر سیلفیز ہوں گی۔ الیکٹرانک مصنوعات بنانے والے ادارے سیم سنگ کی جانب سے برطانیہ میں کرائے جانے والے ایک جائزے کے مطابق اپنی بہترین تصویر کی تلاش میں سیلف پورٹریٹ بنانے والوں میں سترہ فیصد مرد جبکہ دس فیصد خواتین شامل ہوتی ہیں۔

نیشنل گیلری آف آرٹ واشنگٹن میں فوٹو گرافی کے شعبے کی منتظم سارا کینل کہتی ہیں کہ ان کے خیال میں سیلفی خود سے لگاؤ کا اظہار ہے۔ ان کے بقول سیلفی کا بڑھتا ہوا رجحان آج کل کے معاشرے میں موجود نرگسیت کو ظاہر کرتا ہے۔ فوٹوگرافروں نے اس کی مزید وضاحت کرتے ہوئے اس کی تعریف یوں بیان کی کہ سیلفی وہ تصویر ہے، جس میں آپ کا کیمرا خود آپ کی اپنی جانب ہو۔

ابھی حال ہی میں سابق جنوبی افریقی صدر نیلسن مینڈیلا کی تعزیتی تقریب کے دوران امریکی صدر باراک اوباما، برطانوی وزیر اعظم ڈیوڈ کیمرون اور ڈنمارک کی سربراہ حکومت ہیلے تھورننگ کو سیلفی تصویریں بناتے ہوئے ایک دنیا نے دیکھا۔ اس کے علاوہ ٹائم میگزین کی جانب سے 2013ء کی گیارہ یادگار سیلفیز میں پوپ فرانسس کی ایک عقیدت مند اور مشہور گلوکارہ ’بیون سے‘ کی سیلفیز کو بھی شامل کیا گیا ہے۔

ناقدین سیلفی کے بڑھتے ہوئے رجحان سے خوش بھی نہیں ہیں۔ ابھی حال ہی میں نیویارک میں ایک نوجوان لڑکی نے اپنے موبائل سے اپنی ایک تصویر بنائی۔ اس تصویر کے پس منظر میں بروکلن برج دکھائی دے رہا ہے اور اس تصویر میں ایک شخص کو اس پل پر کھڑے ہو کر خود کشی کی کوشش کرتے ہوئے دیکھا جا سکتا ہے۔ نیویارک کے ایک اخبار میں اس تصویر کی اشاعت نے سیلفیز کے حوالے سے شدید بحث کا آغاز کر دیا تھا۔ ابھی حال ہی میں مشہور فرانسیسی فوٹوگرافر چارلس مارویل کی سیلفیز کی نمائش ہوئی۔ انہوں نے اپنی یہ تصاویر انیس ویں صدی میں بنائی تھیں۔ اسی طرح لندن کی نیشنل پورٹریٹ گیلری میں اگلے برس جنوری میں سیلفی کے موضوع پر ایک مباحثہ منعقد کیا جا رہا ہے۔