ہالی وُڈ کا لیجنڈری اسٹوڈیو چینی شہری نے خرید لیا | فن و ثقافت | DW | 12.01.2016
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages

فن و ثقافت

ہالی وُڈ کا لیجنڈری اسٹوڈیو چینی شہری نے خرید لیا

چین کے امیر ترین شہری کی ملکیت وانڈا کاروباری گروپ نے ساڑھے تین ارب ڈالر کے عوض ہالی وُڈ کا بہت سی انتہائی کامیاب فلمیں بنانے والا لیجنڈری اینٹرٹینمنٹ اسٹوڈیو خریدنے کے معاہدے پر دستخط کر دیے ہیں۔

چینی دارالحکومت سے منگل بارہ جنوری کو موصولہ نیوز ایجنسی اے ایف پی کی رپورٹوں کے مطابق وانڈا گروپ اور اس تاریخ ساز امریکی فلم اسٹوڈیو کے مابین معاہدے پر دستخط آج بیجنگ میں کیے گئے۔ وانڈا گروپ کے جاری کردہ ایک بیان کے مطابق یہ ہالی وُڈ اسٹوڈیو آج تک ’جیورَیسک ورلڈ‘ اور ’گوڈزیلا‘ جیسی بہت سی انتہائی کامیاب فلمیں بنا چکا ہے۔

مجموعی طور پر اس امریکی فلم اسٹوڈیو کی تیار کردہ فلمیں آج تک دنیا بھر میں 12 بلین ڈالر سے زائد کا کاروبار کر چکی ہیں۔ ہالی وُڈ کے اسی اسٹوڈیو کی تیار کی گئی دیگر فلموں میں ’پیسیفک رِم‘ اور کچھ عرصہ قبل بنائی گئی تین پروڈکشنز پر مشتمل سیریز ’بَیٹ مین‘ بھی شامل ہیں۔ یہ سب فلمیں بہت زیادہ سرمائے سے بنائی گئی اور ایکشن سے بھرپور ایسی زبردست فلمیں تھیں، جو چینی شائقین میں بہت مقبول رہی تھیں۔

وانڈا گروپ چین میں کئی بہت بڑے بڑے کاروباری اداروں پر مشتمل ایک بزنس گروپ ہے، جس کے مالک وانگ جیان لِن ہیں، جو چین کے امیر ترین شہری ہیں۔ اس چینی بزنس گروپ کے جاری کردہ بیان کے مطابق لیجنڈری اینٹرٹینمنٹ کی خریداری کسی چینی کمپنی کا ثقافتی شعبے میں بین الاقوامی سطح پر آج تک کیا جانے والا سب سے بڑا سودا ہے۔

اے ایف پی نے لکھا ہے کہ چینی تاریخ کی اس سب سے بڑی ’کلچرل بزنس ڈیل‘ کی دستاویز پر دستخطوں کی تقریب سے خطاب کرتے ہوئے وانڈا گروپ کے سربراہ وانگ جیان لِن نے کہا، ’’امریکی فلم کمپنیوں کو بین الاقوامی فلم انڈسٹری میں انتہائی اعلیٰ مقام حاصل ہے لیکن لیجنڈری اینٹرٹینمنٹ کی خریداری سے یہ صورت حال بدل جائے گی۔‘‘

وانڈا گروپ کی طرف سے ہالی وُڈ کا ایک بہت کامیاب فلم اسٹوڈیو خرید لینے سے قبل 1989ء میں الیکٹرانک مصنوعات تیار کرنے والے جاپانی ادارے سونی کارپوریشن نے بھی امریکا کی کولمبیا پکچرز کو خرید لیا تھا۔ اس کے علاوہ ابھی چند ہفتے قبل ہی آن لائن کاروبار کرنے والے ایک بہت بڑے چینی ادارے علی بابا نے بھی ہانگ کانگ سے شائع ہونے والا اخبار ساؤتھ چائنہ مارننگ پوسٹ خرید لیا تھا۔

اس تناظر میں اپنے بزنس گروپ کی طرف سے لیجنڈری اینٹرٹینمنٹ کی خریداری کے بارے میں وانگ جیان لِن نے آج بیجنگ میں کہا کہ یہ کاروباری ڈیل ’بیجنگ کی طرف سے بین الاقوامی سطح پر اپنے ثقافتی اثر و رسوخ میں اضافے کی کوششوں کا نتیجہ‘ نہیں ہے۔

بیجنگ میں آج اس کاروباری ڈیل پر دونوں کمپنیوں کے وکلاء نے دستخط کیے اور اس موقع پر وانڈا گروپ کے سربراہ وانگ جیان لِن اور لیجنڈری اینٹرٹینمنٹ کے چیئرمین اور سی ای او ٹامس ٹَل بھی موجود تھے۔ اس موقع پر وانگ جیان لِن نے کہا، ’’میں بنیادی طور پر صرف کاروباری مفادات پر توجہ دیتا ہوں۔‘‘