’چینی سلک روڈ اٹلی تک پہنچ گیا‘ | حالات حاضرہ | DW | 24.03.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اشتہار

حالات حاضرہ

’چینی سلک روڈ اٹلی تک پہنچ گیا‘

چین اور اٹلی نے تجارت اور ٹرانسپورٹ کے ’سلک روڈ‘ معاہدے پر دستخط کر دیے ہیں۔ یہ دستخط چینی صدر کے اطالوی دورے کے موقع پر کیے گئے۔ چینی صدر اٹلی کے بعد مناکو اور فرانس کا دورہ کریں گے۔

چینی ’شاہراہ ریشم‘ اب ایشیا سے نکل کر یورپ میں پھیلنا شروع ہو گئی ہے۔ اس کی نئی مثال یہ ہے کہ اطالوی حکومت نے ہفتہ تئیس مارچ کو چین کے ساتھ ٹرانسپورٹ اور تجارت کے نئے’سلک روڈ‘ معاہدے پر دستخط کر دیے ہیں۔ اس معاہدے پر بظاہر فریقین کے لیے عمل کرنا لازم نہیں ہے۔ اطالوی میڈیا کے مطابق چینی صدر کے ساتھ طے پانے والے معاہدوں کا حجم پانچ سے آٹھ بلین امریکی ڈالر کے درمیان ہے۔

کل ہفتے کو چینی صدر کے دورے کے دوسرے دن دونوں لیڈروں کی موجودگی میں انتیس نکات پر مشتمل اقتصادی تعلقات کو بہتر بنانے کی ایک تفصیلی یاداشت پر دستخط کیے گئے۔ اس تقریب میں چینی صدر شی جن پنگ کے ساتھ اطالوی وزیراعظم جوزیپے کونٹے بھی موجود تھے۔ چینی صدر تئیس مارچ کو اپنی اہلیہ کے ہمراہ سسلی کے شہر پالیرمو بھی گئے تھے۔

چین کے ساتھ ’سلک روڈ‘ پروٹوکول پر دستخط کرنے سے اٹلی ترقی یافتہ اقوام کے گروپ جی سیون کا وہ پہلا ملک بن گیا ہے، جو چین کے ’ون بیلٹ اینڈ روڈٴ‘ سلسلے کا حصہ بنا ہے۔ اس سمجھوتے پر بعض یورپی ممالک نے تحفظات کا اظہار بھی کیا ہے۔ اسی چینی منصوبے میں پرتگال نے بھی گزشتہ برس دسمبر میں شمولیت اختیار کر لی تھی۔

Italien Rom | Xi Jinping, Präsident China & Giuseppe Conte, Premierminister (Reuters/Y. Nardi)

چینی صدر شی جن پنگ اور اٹلی کے وزیراعظم جوزیپے کونٹے

چینی صدر شی جن پنگ اتوار چوبیس مارچ کو اٹلی کا تین روزہ دورہ مکمل کرنے کے بعد فرانس پہنچ رہے ہیں۔ یہ اُن کے موجودہ سہ ملکی دورے کی آخری منزل ہے۔ وہ بحیرہ روم کے کنارے پر واقع شہر نیس پہنچنے کے بعد مناکو جائیں گے۔ مناکو یورپ کا ایک انتہائی چھوٹا مگر متمول ملک ہے۔

کل پیر پچیس مارچ کو صدر شی جن پنگ پیرس میں اپنے میزبان صدر ایمانوئل ماکروں سے ملاقات کریں گے۔ دونوں صدور کی ملاقات چین اور فرانس کے روابط استوار ہونے کی 55 ویں سالگرہ کے موقع پر ہو رہی ہے۔ ماہرین کے مطابق اس ملاقات میں چینی صدر اپنے ملک کے یورپی یونین کے ساتھ تعلقات کو مزید مستحکم کرنے کی کوشش کریں گے۔

منگل چھبیس مارچ کو فرانسیسی و چینی صدور یعنی ایمانوئل ماکروں اور شی جن پنگ کے ساتھ جرمن چانسلر انگیلا میرکل اور یورپی کمیشن کے صدر ژاں کلود ینکر ایک میٹنگ میں شریک ہوں گے۔ یہ میٹنگ اگلے ماہ چین یورپی یونین سمٹ کے لیے اہم نکات مرتب کرنے کے سلسلے میں ہے۔

ویڈیو دیکھیے 03:53

کیا میرکل ’آزاد دنیا‘ کی نئی قائد ہیں؟

DW.COM

Audios and videos on the topic