ٹیکساس: پارک شدہ ٹرک سے آٹھ لاشیں برآمد
23 جولائی 2017سان انٹونیو کے پولیس سربراہ ولیم میک مانُس اور فائر بریگیڈ کے سربراہ چارلس ہوڈ نے صحافیوں کو بتایا کہ 28 دیگر افراد زخمی حالت میں ملے ہیں، جن میں سے 20 کی حالت تشویش ناک ہے اور سات مختلف ہسپتالوں میں ان کا علاج کیا جا رہا ہے۔ پولیس سربراہ کے مطابق ہلاک ہونے والے تمام بالغ افراد ہیں۔ ان کا یہ بھی کہنا تھا کہ جس ٹرک سے یہ لاشیں اور زخمی افراد ملے ہیں اس کے ڈرائیور کو گرفتار کر لیا گیا ہے۔
میک مانُس نے ایک پریس کانفرنس کے دوران بتایا، ’’ہمیں وال مارٹ کے ایک ملازم کی کال موصول ہوئی جس کا کہنا تھا کہ ٹریکٹر ٹریلر وہاں پارک ہے۔ اس ملازم کے پاس اس ٹرک میں سے ایک فرد پہنچا تھا جو پینے کے لیے پانی کی تلاش میں تھا۔‘‘
پولیس سربراہ کے مطابق اس ملازم نے مذکورہ شخص کو پانی فراہم کیا اور ساتھ ہی پولیس کو بھی کال کر دیا۔ پولیس نے وہاں پہنچ کر اس ٹریلر کے پچھلے حصے میں آٹھ لاشوں کو برآمد کیا۔ اس کے علاوہ 20 دیگر ایسے افراد بھی ملے جن کی حالت یا تو انتہائی تشویشناک تھی یا بہت نازک۔ سان انٹونیو پولیس کے سربراہ کے مطابق وال مارٹ کی فوٹیج میں یہ بھی دیکھا جا سکتا ہے کہ وہاں کچھ گاڑیاں آئیں اور مذکورہ ٹرک سے کچھ لوگوں کو ساتھ لے گئیں۔ ان کا کہنا تھا کہ پولیس انسانی اسمگلنگ کے حوالے سے اس واقعے کی تفتیش کر رہی ہے اور ابھی تک یہ واضح نہیں ہے کہ کتنے لوگ وہاں سے نکلنے میں کامیاب رہے۔
فائر بریگیڈ کے سربراہ چارلس ہوڈ کے مطابق مذکورہ ٹریلر کا ایئرکنڈیشنگ نظام کام نہیں کر رہا تھا۔ سان انٹونیو شہر میکسیکو کی ریاست نُوایو لیون کی سرحد سے چند گھنٹوں کی مسافت پر واقع ہے جبکہ اس علاقے کا موسم شدید گرم اور خشک تھا۔
پولیس سربراہ کے مطابق اس واقعے کی اطلاع وفاقی امیگریشن حکام اور کسٹم حکام کو بھی کر دی گئی ہے۔