نازی دور کے مظالم بھلائے نہیں جا سکتے، جرمن صدر

جرمن صدر یوآخم گاؤک نے اڈولف ہٹلر کے دور میں بیرگن بیلزن میں قائم اذیتی مرکز کو ستر برس قبل آزاد کرانے پر برطانوی فوج کا شکریہ ادا کیا۔ یوآخم گاؤک نے اس مناسبت سے اہتمام کردہ ایک خصوصی تقریب سے اپنے خطاب میں کہا، ’’برطانوی فوجی ایک ایسے جمہوری معاشرے کے سفیر بن کر آئے تھے، جس کی بنیاد بدلے اور دشمنی پر نہیں رکھی گئی تھی۔ ساتھ ہی یہ فوجی قانون کی حکمرانی اور انسانی وقار کا ایک ایسا پیغام بھی لے کر آئے تھے، جس نے جرمن معاشرے کی بحالی میں اہم کردار ادا کیا تھا۔‘‘ جرمن صدر نے مزید کہا کہ وہ اس موقع پر ماضی کے اس نازی اذیتی مرکز کو آزاد کرانے والوں کا تہہ دل سے شکریہ ادا کرنے کی ضرورت محسوس کرتے ہیں۔

بیرگن بیلزن کے اسی اذیتی مرکز میں منعقد ہونے والی اس تقریب میں مختلف سماجی شعبوں سے تعلق رکھنے والے سرکردہ افراد کے ساتھ ساتھ ان چند افراد نے بھی شرکت کی، جو ذاتی طور پر اس نازی اذیتی کیمپ میں صعوبتیں برداشت کر چکے ہیں۔ گاؤک نے مزید کہا کہ نازیوں کے جرائم کو یاد رکھنے اور دنیا میں انسانی حقوق اور وقار کے لیے سرگرم رہنے کی ضرورت ہے۔ اس موقع پر یہودیوں کی ورلڈ کانگریس نامی تنظیم کے صدر رونالڈ لاؤڈر نے اپنے خطاب میں یورپ میں یہودیوں کی مخالفت اور بڑھتی ہوئی سام دشمنی پر اپنے تحفظات کا اظہار کیا۔

بیرگن بیلزن کا علاقہ جرمن صوبے لوئر سیکسنی میں واقع ہے۔ اس تقریب میں اس صوبے کے وزیر اعلٰی اشٹیفن وائل بھی شریک ہوئے۔ انہوں نے کہا کہ دوسری عالمی جنگ اور نازی دور میں ڈھائے جانے والے ان مظالم کو کبھی بھی فراموش نہیں کیا جانا چاہیے۔ اُن کے بقول، ’’قتل کبھی بھی پرانا نہیں ہوتا اور قتل عام اور نسل کشی کو تو کسی صورت بھی بھلایا نہیں جا سکتا۔‘‘ وائل نے مزید کہا کہ جرمنی میں نسل پرستی، غیر ملکیوں کے خلاف تعصب اور دائیں بازو کی انتہا پسندی کے ہر طرح کے نشانات کو مٹا دینے کے لیے مزید اقدامات کی ضرورت ہے۔ ’’جب پناہ گزینوں کے مراکز کے نذر آتش کر دیے جانے کا خطرہ ہو، جب یہودی جرمنی میں خود کو غیر محفوظ محسوس کریں، جب کسی کو اس کے عقیدے کی وجہ سے نقصان پہنچایا جائے، تو ہمیں اس صورتحال کو مسترد کرتے ہوئے فوری طور پر اقدامات کرنے چاہییں۔‘‘

بیرگن بیلزن کے اس نازی اذیتی مرکز کو دوسری عالمی جنگ کے دوران تعمیر کیا گیا تھا۔ اس دور میں یہاں تقریباً دو لاکھ سے زائد قیدیوں کو لایا گیا تھا، جن میں سے باون ہزار کو وہیں پر ہلاک کر دیا گیا تھا۔ اسی دوران آج ہی فلوسن بورگ اور فرانس کے علاقے ناٹز وائلر میں بھی ماضی کے نازی اذیتی مراکز کی آزادی کے ستر برس پورے ہونے کے موقع پر خصوصی تقاریب کا اہتمام کیا گیا۔