1. مواد پر جائیں
  2. مینیو پر جائیں
  3. ڈی ڈبلیو کی مزید سائٹس دیکھیں
اسانج فیصلے کے خلاف اپیل کریں گےتصویر: AP

لندن: جولیان اسانج کے خلاف عدالتی فیصلہ

24 فروری 2011

برطانیہ کی ایک عدالت نے وکی لیکس کے خالق جولیان اسانج کی وہ اپیل مسترد کر دی ہے، جس میں انہوں نے کہا تھا کہ ان کو جنسی زیادتی سے متعلق کیس میں ملک بدر کر کے سویڈن نہ بھیجا جائے۔

https://www.dw.com/ur/%D9%84%D9%86%D8%AF%D9%86-%D8%AC%D9%88%D9%84%DB%8C%D8%A7%D9%86-%D8%A7%D8%B3%D8%A7%D9%86%D8%AC-%DA%A9%DB%92-%D8%AE%D9%84%D8%A7%D9%81-%D8%B9%D8%AF%D8%A7%D9%84%D8%AA%DB%8C-%D9%81%DB%8C%D8%B5%D9%84%DB%81/a-6450084
جولیان اسانج نے برطانوی عدالت سے اپیل کی تھی کہ ان کو سویڈن نہ بھیجا جائے، کیونکہ ان کو خدشہ ہے کہ جنسی زیادتی کے الزام کی آڑ میں ان کو امریکہ کے حوالے کیا جا سکتا ہے۔ امریکی حکومت اسانج پر ملکی راز وکی لیکس ویب سائٹ پر افشا کرنے کے الزام میں غداری تک کا مقدمہ چلا سکتی ہے۔

واضح رہے کہ اسانج نے وکی لیکس کے ذریعے امریکی سفارت خانوں کی خفیہ اور حساس دستاویزات شائع کر دی تھیں، جس کے بعد سے ان کو امریکی انتظامیہ کی برہمی کا سامنا ہے۔ ان سفارتی دستاویزات میں امریکی سفارت کاروں کی وہ خط و کتابت بھی شامل ہے، جس میں وہ مختلف ممالک اور ان کے رہنماؤں اور خاص طور پر دہشت گردی کے خلاف جنگ کے حوالے سے اپنے خیالات کا اظہار کرتے رہے ہیں۔

ان دستاویزات کی وکی لیکس ویب سائٹ پر اشاعت کے بعد سے اسانج کو عالمی شہرت حاصل ہو چکی ہے۔

Jahresrückblick international 2010 November Flash-Galerie
وکی لیکس ویب سائٹ نے دنیا بھر میں تہلکہ مچا دیا ہے

لندن کی ایک عدالت کے جج ہاورڈ رڈل نے جمعرات کے روز اپنا فیصلہ سناتے ہوئے اسانج کی اس دلیل کو مسترد کر دیا کہ سویڈن میں ان کے خلاف مقدمہ شفاف نہیں ہوگا۔ اسانج نے فیصلے کے فوراً بعد اس کے خلاف اپیل کرنے کا اعلان کر دیا ہے۔

اسانج کا موقف ہے کہ ان کے خلاف گزشتہ برس اگست میں دو خواتین کے ساتھ جنسی زیادتی کا الزام امریکی دباؤ کا نتیجہ ہے اور اس الزام کی نوعیت سیاسی ہے۔ ان کا کہنا ہے کہ یہ وکی لیکس پر امریکی دستاویزات شائع کرنے کی پاداش میں ہے۔

برطانوی عدالت نے اپنا فیصلہ سناتے ہوئے یہ بھی کہا کہ جولیان اسانج اور ان کے وکیل نے عدالت کو گمراہ کرنے کی کوشش کی۔ عدالت نے ان کی یہ دلیل بھی رد کر دی کہ اسانج کی گرفتاری کے لیے جاری کیا جانے والا وارنٹ غیر قانونی ہے۔ جج ہاورڈ رڈل نے اپنے ریمارکس میں کہا کہ ان کو یورپی اداروں پر پورا اعتماد ہے۔

Dossierbild Wikileaks Julian Assange 08.02.2011 Prozess Bild 2
اسانج اور ان کے وکیل نے عدالت کو گمراہ کیا، برطانوی جج کے ریمارکستصویر: picture-alliance/dpa

وکی لیکس کے خالق اسانج کو برطانیہ میں سات دسمبر 2010ء کو گرفتار کیا گیا تھا۔ ان کو نو دن تک حراست میں رکھا گیا تاہم بعد میں وہ ضمانت پر رہا کردیے گئے تھے۔ تب سے اب تک وہ مشرقی لندن میں اپنے ایک دوست کے گھر میں مقیم ہیں جہاں ان کی کڑی نگرانی کی جا رہی ہے۔

وکی لیکس کو جدید میڈیا کے دور میں ایک منفرد حیثیت حاصل ہو چکی ہے۔ حال ہی میں اسانج نے ایک بیان میں کہا تھا کہ تیونس میں صدر زین العابدین اور مصر میں حسنی مبارک کی حکومتوں کے خاتمے میں وکی لیکس نے بھی ایک بڑا کردار ادا کیا ہے۔

رپورٹ: شامل شمس ⁄ خبر رساں ادارے

ادارت: مقبول ملک

ڈی ڈبلیو کی اہم ترین رپورٹ سیکشن پر جائیں

ڈی ڈبلیو کی اہم ترین رپورٹ

Pakistan | Monsun Überschwemmungen

کئی ملین پاکستانی سیلاب متاثرین کو غذائی بحران کا سامنا

ڈی ڈبلیو کی مزید رپورٹیں سیکشن پر جائیں
ہوم پیج پر جائیں