1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اشتہار
اشتہار
اشتہار

اہم عالمی خبریں | 31.07.2021 | 05:00

عمان کے سمندر کے قریب آئل ٹینکر پر حملہ ڈرون سے کيا گيا، امریکی بحریہ

امریکی بحریہ کے دھماکا خیز مواد سے متعلق ماہرین کا خیال ہے کہ بحیرہ عرب میں عمان کے پانیوں کے قریب آئل ٹینکر پر ہونے والا حملہ ممکنہ طور پر ڈرون طيارے سے کيا گيا تھا۔ جمعرات کی رات اس بحری جہاز پر ہوئے حملے میں دو افراد ہلاک ہو گئے تھے۔ اس واقعے کی ذمہ داری کسی ملک یا تنظیم نے قبول نہیں کی ہے تاہم اسرائیل نے اس کا الزام ایران پر عائد کیا ہے۔ اس سمندری خطے میں ایران اور مغربی ممالک کے درمیان کشیدگی تو طویل عرصے سے جاری ہے، تاہم کسی تجارتی بحری جہاز پر حملے میں ہلاکتوں کا یہ انوکھا واقعہ ہے۔

بھارت میں مون سون کی بارشیں، مزید گیارہ ہلاکتیں

بھارت میں مون سون کی شدید بارشوں کے نتیجے میں مزید گیارہ افراد ہلاک ہو گئے ہیں۔ اس طرح وہاں ایسی ہلاکتوں کی تعداد دو سو تیس سے زائد ہو گئی ہے۔ بھارت میں برساتی طوفانوں سے کئی علاقے شدید متاثر ہوئے ہیں۔ ہفتے کے روز حکام نے بتایا کہ ریاست مغربی بنگال میں شدید برساتی طوفان کی وجہ سے بڑے پیمانے پر تباہی آئی ہے۔ بتایا گیا ہےکہ مغربی بنگال کے دو اضلاع ان بارشوں سے زیادہ متاثر ہوئے ہیں، جہاں متعدد افراد لاپتا بھی ہیں۔ بھارتی ریاستوں مہاراشٹر، جھاڑکھنڈ، اتراکھنڈ اور ہماچل پردیش میں بھی شدید بارشیں جاری ہیں۔

افغانستان میں اقوام متحدہ کی عمارت پر حملہ، ایک پولیس گارڈ ہلاک

افغان شہر ہیرات میں واقع اقوام متحدہ کی ایک عمارت پر حملے میں ایک افغان پولیس اہلکار ہلاک ہو گیا ہے۔ اس مغربی افغان شہر کے بیرونی حصے میں افغان فورسز اور طالبان کے درمیان لڑائی جاری ہے۔ افغانستان سے غیرملکی افواج کے انخلاء کے عمل کے دوران رواں برس مئی سے طالبان کی ملک بھر میں کارروائیوں میں شدید اضافہ دیکھا گیا ہے۔ اس دوران طالبان نے ملک کے کئی اضلاع پر قبضہ کر لیا ہے، جن میں ہیرات صوبے کے متعدد اضلاع بھی شامل ہیں۔ افغانستان کے لیے خصوصی عالمی مندوب ڈیبرہ لیونز نے اس حملے کی شدید مذمت کی ہے اور کہا ہے کہ اس حملے میں ملوث افراد کو انصاف کے کٹہرے میں لایا جانا چاہیے۔

ترک ایمرجنسی کارکن جنگلاتی آگ کے خلاف برسرپیکار

ترکی میں ایمرجنسی سروسز کے کارکن مسلسل تیسرے روز جنگلاتی آگ کو قابو میں لانے کی کوششوں میں مصروف ہیں۔ بتایا گیا ہے کہ انطالیہ کے خطے میں معروف سیاحتی علاقے کے قریب دس مقامات پر جنگلاتی آگ لگی ہوئی ہے، جب کہ اس صوبے میں مجموعی طور پر دیگر 98 مقامات پر جنگلاتی آتش زدگی جاری ہے۔ حکام کا کہنا ہے کہ اس صوبے میں 88 مقامات پر آگ پر قابو پایا جا چکا ہے۔ اسی تناظر میں کئی ہوٹلوں کو سیاحوں سے خالی کرا لیا گیا ہے۔

اٹلی میں جنگلاتی آگ بجھانے کی کوششیں جاری

اٹلی میں جنگلاتی آگ کی وجہ سے سسلی کا ہوائی اڈہ عارضی طور پر بند کرنا پڑ گیا ہے۔ بتایا گیا ہے کہ اٹلی میں 800 سے زائد مقامات پر فائر بریگیڈ کی کارروائیاں جاری ہیں۔ حکام کے مطابق فقط سسلی میں ہی ایمرجنسی عملے کو ڈھائی سو مرتبہ طلب کیا گیا۔ کاتانیا کے علاقے میں پھنسے تقریباﹰ ڈیڑھ سو افراد کو پولیس کی ایک کشتی کے ذریعے محفوظ مقام پر منتقل کیا گیا۔

حاملہ خواتین ویکیسن لگوائیں، برطانوی حکومت کی اپیل

برطانوی طبی حکام نے اپیل کی ہے کہ ڈیلٹا ویریئنٹ کے پھیلاؤ کے تناظر میں حاملہ خواتین کورونا وائرس سے تحفظ کی ویکیسن لگوائیں۔ تازہ ترین ڈیٹا کے مطابق حاملہ خواتین میں کورونا وائرس کی وجہ سے شدید علامات کے باعث ہسپتال منتقلی کے واقعات میں اضافہ دیکھا گیا ہے۔ رائل کالج آف مڈوائیوز اور رائل کالج آف گائناکالوجی کی جانب سے حاملہ خواتین سے کہا گیا ہے کہ وہ اپنی اور اپنے بچوں کی زندگیوں کے تحفظ کے لیے ویکیسن لگوائیں۔

عراق میں جنازے کے اجتماع پر حملہ، متعدد افراد ہلاک

عراقی شہر یثرب میں جنازے کے ایک اجتماع پر ہوئے ایک حملے میں کم از کم 13 افراد ہلاک جب کہ 50 سے زائد زخمی ہو گئے ہیں۔ بتایا گیا ہےکہ جمعے کے روز مشین گنوں سے لیس اسلامک اسٹیٹ کے جنگجوؤں نے اس اجتماع کو نشانہ بنایا۔ سرکاری طور پر نہ تو اس واقعے میں ہلاکتوں کی اصل تعداد بتائی گئی ہے اور نہ ہی یہ بتایا گیا ہے کہ دراصل کیا ہوا۔ اس واقعے سے فقط ڈیڑھ ہفتہ قبل دارالحکومت بغداد میں ایک مارکیٹ پر ہوئے حملے میں کم ازکم تیس افراد ہلاک جب کہ پچاس زخمی ہو گئے تھے۔

23 مقامات پر خوراک کی شدید قلت کی صورت حال پیدا ہو سکتی ہے، اقوام متحدہ

اقوام متحدہ کے ادارہ برائے خوراک کا کہنا ہے کہ اگلے تین ماہ میں دنیا میں 23 مقامات پر خوراک کی شدید قلت پیدا ہو سکتی ہے۔ عالمی ادارے کے مطابق ایتھوپیا کے ’تباہ کن حالات‘ کا سامنا کرنے والے تیگری خطے کے علاوہ جنوبی مڈغاسکر، یمن، جنوبی سوڈان اور شمالی نائجيریا اس صورت حال سے شدید متاثرہ ہو سکتے ہیں۔ ’ہنگر ہاٹ اسپاٹ‘ سے متعلق اس رپورٹ میں کہا گیا ہے کہ یہ علاقے پہلے ہی خوراک کی قلت کا شکار ہیں تاہم اگست سے نومبر تک کے عرصے میں یہ صورت حال بدتر ہو سکتی ہے۔ رپورٹ میں کہا گیا ہے کہ شدید خشک سالی کے شکار جنوبی مڈغاسکر میں 14000 افراد خوراک کی قلت کے باعث موت کے منہ میں جا سکتے ہیں۔

جاپان میں اولمپکس سے جڑے کورونا وائرس کے 21 نئے کیسز

اولمپک کھيلوں کے منتظمین نے کہا ہے کہ ٹوکیو میں جاری مقابلوں سے جڑے کورونا انفیکشنز کے 21 نئے کیسز ریکارڈ کیے گئے ہیں۔ اس طرح رواں ماہ جاپان میں اولمپکس سے جڑے کورونا انفیکشنز کی تعداد 241 ہو گئی ہے۔ حکام کے مطابق ان نئے کیسز میں کوئی ایتھلیٹ شامل نہیں ہے۔ تاہم اس سے قبل جرمن سائیکلسٹ زیمون گشکے اور امریکی کھلاڑی سیم کین ڈِرکس میں اس وائرس کی تشخیص ہوئی تھی۔ اولمپک مقابلوں کے آغاز سے اب تک مجموعی طور پر 33 ایتھلیٹس میں یہ وائرس تشخیص ہو چکا ہے۔ ملک میں کورونا انفیکشز کی تعداد میں اضافے کے تناظر میں ٹوکیو میں نافذ ہنگامی حالت میں توسیع کا اعلان کر ديا گیا تھا۔

شمالی پیرو میں زلزلہ، کم از کم 40 افراد زخمی

جنوبی امریکی ملک پیرو میں جمعے کو آنے والے ايک طاقت ور زلزلے کے نتیجے میں کم از کم 40 افراد زخمی ہو گئے ہيں۔ مقامی حکام کے مطابق تین افراد شدید زخمی حالت میں ہسپتال پہنچائے گئے، جن میں ایک حاملہ خاتون بھی شامل ہے۔ چھ اعشاریہ ایک کی شدت کا یہ زلزلہ پیورا خطے میں زمین میں 36 کلومیٹر کی گہرائی میں آیا۔ اس زلزلے کے جھٹکے ہم سایہ ملک ایکواڈور تک محسوس کیے گئے۔ بتایا گیا ہے کہ اس زلزلے کے نتیجے میں 187 مکانات کو نقصان پہنچا جن میں چھ مکمل طور پر تباہ ہو گئے۔ واضح رہے کہ پیرو کی مغربی ساحلی پٹی عموماً زلزلوں کی زد میں رہتی ہے۔

روسی ہیکروں نے وفاقی پراسیکیوٹرز کو سائبر حملوں کا نشانہ بنایا، امریکی محکمہ انصاف

امریکی محکمہ انصاف کا کہنا ہے کہ گزشتہ برس ملک کے وفاقی دفتر استغاثہ کے عہدیداروں پر ہوئے سائبر حملوں میں روسی ہیکرز ملوث تھے۔ بیان میں کہا گیا ہے کہ نیو یارک میں چار امریکی اٹارنی دفاتر کے مائیکرو سافٹ ای میلز کے حامل پراسیکیوٹرز میں سے اسی فیصد کے اکاؤنٹس کو ہیک کیا گیا۔ جمعے کے روز جاری کردہ بیان میں بتایا گیا ہے کہ یہ حملے گزشتہ برس سات مئی سے 27 دسمبر کے درمیان ہوئے اور اس میں 27 امریکی اٹارنی دفاتر میں سے ہر ایک کے کم ازکم ایک ملازم کی ای میل ہیک ضرور ہوئی۔

وسطی یمن میں ایران نواز حوثی باغیوں کی پیش قدمی

ایران نواز حوثی باغیوں نے جمعے کے روز یمن کے وسطی البیضا صوبے کے دو اضلاع پر قبضہ کر لیا ہے۔ حوثی باغیوں اور سرکاری فورسز کے درمیان وسطی یمنی شہر مارب کے علاقے پر قبضے کی لڑائی جاری ہے۔ حوثی فورسز کے ترجمان یحیٰ سرے کی جانب سے حوثی باغیوں کے زیرانتظام چلنے والے ٹی وی چینل المصریہ پر بتایا گیا ہے کہ البیضا صوبے کے نعمان اور ناطہ اضلاع پر قبضہ کر لیا گیا ہے اور اب صوبے میں حکومتی فورسز کے دیگر ٹھکانوں کی جانب بڑھا جا رہا ہے۔ واضح رہے کہ حوثی باغی وسطی شہر مارب پر قبضے کے لیے رواں برس فروری سے حملے کر رہے ہیں۔

آڈیو سنیے 04:00
ویڈیو دیکھیے 09:17