سعودی عرب کی مدد کے لیے امریکی کمانڈوز کی تعیناتی، رپورٹ

اخبار نے یہ رپورٹ امریکی ذرائع اور یورپی سفارت کاروں کی معلومات پر جاری کی ہے۔ پینٹاگون کے ترجمان میجر ایڈریان رینکینے گالووے نے کہا ہے کہ امریکا جنگی مشن میں شامل ہوئے بغیر صرف معلومات کے تبادلے پر توجہ مرکوز کیے ہوئے ہے اور اس کا مقصد سعودی عرب کی سرحد کو محفوظ بنانا ہے۔

یمن میں تین برس پہلے شروع ہونے والی جنگ کے بعد سے ایرانی حمایت یافتہ حوثی باغی سعودی عرب پر متعدد میزائل حملے کر چکے ہیں۔ شائع ہونے والی اس رپورٹ اور یورپی سفارت کاروں کے مطابق امریکی اسپیشل آپریشن فورسز گزشتہ برس دسمبر میں سعودی عرب پہنچی تھیں، جن کا مقصد میزائل حملوں کے ساتھ ساتھ حوثی باغیوں کو ان میزائلوں کی فراہمی کے نظام کو بھی تباہ کرنا تھا۔ اس رپورٹ سے ظاہر ہوتا ہے کہ دس ہزار سے زائد ہلاکتوں کا سبب بننے والی یمن جنگ میں امریکا کی شمولیت کس حد تک ہے۔

پینٹاگون کی طرف سے جاری ہونے والے ایک بیان کے مطابق سکیورٹی وجوہات کی بنیاد پر وہ سرحد پر تعینات فورسز کے حوالے سے کوئی تبصرہ نہیں کرنا چاہتے۔  میجر ایڈریان رینکینے گالووے کا مزید کہنا تھا، ’’یہ ایک محدود حمایت ہے، جس کے تحت خفیہ معلومات کے تبادلے کے ساتھ ساتھ سرحد کو محفوط بنانے میں تعاون فراہم کیا جاتا ہے۔‘‘

رپورٹ کے مطابق امریکی فورسز سعودی فوجیوں کو تربیت بھی فراہم کر رہے ہیں لیکن ابھی تک ایسے کوئی اشارے نہیں ملے، جن سے یہ پتا چلتا ہو کہ امریکی فوجی سرحد عبور کرتے ہوئے یمن میں داخل ہوئے ہیں۔

سعودی عرب نے سن دو ہزار پندرہ سے حوثی باغیوں کے خلاف ایک عسکری اتحاد قائم کر رکھا ہے، جسے امریکی حمایت بھی حاصل ہے۔ اسی طرح سعودی صوبے نجران میں بھی سعودی اہلکار  امریکی انٹیلی جنس ماہرین کے ساتھ مل کر کام کر رہے ہیں۔

سعودی ولی عہد محمد بن سلمان کے امریکی صدر ڈونلڈ ٹرمپ کے ساتھ خصوصی تعلقات ہیں۔ حال ہی میں امریکی قانون سازوں نے یمن جنگ میں امریکا کے کردار کے حوالے سے خدشات کا اظہار کیا ہے۔

ا ا / ع ح