’خلابازوں کا نیا ساتھی‘جذبات سے بھرپور روبوٹ | سائنس اور ماحول | DW | 06.12.2019
  1. Inhalt
  2. Navigation
  3. Weitere Inhalte
  4. Metanavigation
  5. Suche
  6. Choose from 30 Languages
اشتہار

سائنس اور ماحول

’خلابازوں کا نیا ساتھی‘جذبات سے بھرپور روبوٹ

مصنوعی دانش کے حامل روبوٹ کو اُس کے خلائی سفر پر روانہ کر دیا گیا ہے۔ اس کی منزل بین الاقوامی خلائی مرکز ہے۔ یہ وہاں موجود خلابازوں کی ذہنی صحت کی حفاظت کرے گا۔

روبوٹ کا نام سائمن ایک اصطلاح 'کریو انٹرایکٹو موبائل کمپینیئن ٹو‘ (Crew Interactive Mobile Companion) کا مخفف ہے۔ مصنوعی دانش سے آراستہ اس روبوٹ کو جمعرات پانچ دسمبر کو امریکی شہر فلوریڈا سے روانہ کیا گیا۔ اسے ایک نجی خلائی کمپنی اسپیس ایکس نے اپنے خلائی جہاز کے ذریعے خلائی اسٹیشن کی جانب بھیجا ہے۔

سائمن روبوٹ میں مائیکروفون اور کیمروں کے ساتھ ساتھ ایسا خصوصی سافٹ ویئر نصب کیا گیا ہے، جو انسانی جذبات و احساسات کو پڑھنے کی صلاحیت رکھتا ہے۔ یہ روبوٹ پلاسٹک کی تھری ڈی پرنٹنگ کا شاہکار ہے۔ خلا میں روانہ کیا گیا روبوٹ سن 2018 میں تیار کیے گئے ایسے ہی ایک روبوٹ کا جدید یا اپ گریڈ کیا گیا نمونہ ہے۔

انسانوں کے ساتھ ہم آہنگی پیدا کرنے والا یہ روبوٹ جلد ہی خلائی اسٹیشن پہنچ جائے گا اور وہاں موجود خلابازوں کی ذہنی صحت کو بہتر کرنے میں مدد گار ہو گا۔ خلائی اسٹیشن پر مہینوں رہنے والے خلابازوں کو طویل عرصے تک تنہا رہنے اور عدم رابطوں کا سامنا رہتا ہے اور یہ صورتحال ان کے جذبات پر منفی اثرات کا باعث بنتی ہے۔ روبوٹ ایسے منفی اثرات کو زائل کرنے میں مدد کرے گا۔

Cimon In Columbus Laboratory Abord ISS (picture-alliance/Zuma/Esa)

انسانوں کے ساتھ ہم آہنگی پیدا کرنے والا یہ روبوٹ جلد ہی خلائی اسٹیشن پہنچ جائے گا

سائمن روبوٹ انگریزی میں ہمکلام ہوتا ہے اور اسے انفارمیشن ٹیکنالوجی کے بڑے امریکی ادارے آئی بی ایم (IBM) نے تخلیق کیا ہے۔ توقع کی گئی ہے کہ یہ روبوٹ اگلے تین برسوں تک انٹرنیشنل خلائی اسٹیشن پر رکھا جائے گا۔ اس سے قبل بھی ایسے روبوٹ روانہ کیے گئے تھے لیکن ان کی مدتِ قیام سائمن کے مقابلے میں تین گنا کم تھی۔

سائمن روبوٹ بنانے والے ادارے آئی بی ایم کی ٹیم کے سربراہ ماتھیاس بینوئک کا کہنا ہے کہ اس روبوٹ کی تخلیق کا بنیادی مقصد اسے کسی بھی انسان کا درست اور صحیح ساتھی بنانا ہے۔ بینوئک نے واضح کیا کہ اس تناظر میں خلاباز اور سائمن کے درمیان پیدا ہونے والا تعلق نہایت اہم ہو گا کیونکہ یہ روبوٹ خلاباز کے اداس ہونے پر اور اسی طرح خلاباز کی خفگی یا مسرت پر بھی اپنا رد عمل ظاہر کیا کرے گا۔

ع ح ⁄ ع ا (اے پی، روئٹرز)

DW.COM

Audios and videos on the topic