حادثے کی وجوہات ضرور جانیں گے، تباہ شدہ خلائی راکٹ کی مالک کمپنی

منگل اور بدھ کی درمیانی شب امریکی ریاست ورجینیا کے ساحلی علاقے پر قائم والپس فلائٹ فیسیلیٹی نامی ایک کمرشل لانچنگ پیڈ سے اپنی روانگی کے چند ہی لمحوں بعد انتارس راکٹ تباہ ہو گیا۔ امریکی خلائی ادارے ناسا کی جانب سے اس 14 منزلہ کمرشل راکٹ کے ذریعے بین الاقوامی خلائی اسٹیشن ISS کے لیے ضروری سامان روانہ کیا گیا تھا۔

نجی کمپنی Orbital Sciences کے اس راکٹ کو پیش آنے والے حادثے کی وجہ تاحال معلوم نہیں ہو سکی ہے۔ اس کمپنی نے عوام سے کہا ہے کہ اس راکٹ کے ملبے کو نہ چھوا جائے، کیوں کہ اس میں خطرناک مواد موجود تھا۔

آربیٹل سائنسز کارپوریشن کا یہ راکٹ منگل کی شب روانہ ہوا، تو چند ہی ثانیوں بعد ایک دھماکے کے ساتھ ہی اس راکٹ میں آگ بھڑک اٹھی اور اس کے فوری بعد یہ راکٹ زمین پر گر گیا۔

اس کارگو خلائی جہاز میں 22 سو ستر کلوگرام خوراک اور تجربات کے لیے سائنسی آلات موجود تھے۔ ناسا کی جانب سے کہا گیا ہے کہ بین الاقوامی اسپیس اسٹیشن پر موجود خلانوردوں کے پاس فی الوقت خاصی مقدار میں خوراک اور دیگر سامان موجود ہے، تاہم زمین کی سطح سے 260 کلومیٹر بلندی پر موجود ان خلابازوں تک خوراک اور آلات کی نئی کھیپ جلد ہی روانہ کر دی جائے گی۔ ناسا کا کہنا ہے کہ خلانوردوں کے پاس موجود خوراک اگلے برس موسم بہار تک کے لیے کافی ہے اور اس سے قبل ہی رسد ان تک پہنچ جائے گی۔

امریکی خلائی تحقیق کے ادارے ناسا کی شٹلز اپنی عمر مکمل کر چکی ہیں اور اب یہ وفاقی ادارہ ورجینیا سے تعلق رکھنے والی آربیٹل سائنسز کارپوریشن اور کیلیفورنیا کی کمپنی اسپیس ایکس کے راکٹوں کو بین الاقوامی خلائی اسٹیشن تک رسائی کے لیے استعمال کرنے پر مجبور ہے۔

امریکی کمپنی بوئنگ بھی سن 2017ء سے امریکی خلابازوں کو زمین سے باہر لے جانے کے لیے اپنی خدمات کا آغاز کرنے والی ہے۔ یہ بات بھی اہم ہے کہ رواں برس دسمبر میں اسپیس ایکس کارگو کی ایک کھیپ پر مشتمل اپنا راکٹ ڈریگن فلوریڈا میں واقع کیمپ کینیورل سے آئی ایس ایس کی جانب روانہ کرے گی۔

منگل کے روز تک ان دونوں کمرشل کمپنیوں کی خدمات غلطیوں سے پاک انداز سے جاری تھیں، تاہم اس حادثے کے بعد اب یہ بحث پھر شروع ہو چکی ہے کہ کیا ناسا کو اس سلسلے میں نجی کمپنیوں پر ہی بھروسہ کرنا چاہیے یا زیادہ سے زیادہ خود انحصاری کی جانب بڑھنا چاہیے۔

آربیٹل سائنسز کے ایگزیکٹیو وائس پریذیڈنٹ فرینک کیلبرٹسن نے کہا ہے کہ کمپنی نے اس مشن کے لیے دو سو ملین ڈالر سے زائد کی انشورنس کرا رکھی تھی۔ تاہم دوسری جانب اس حادثے کے بعد اس کمپنی کے حصص میں 15 فیصد کی کمی ریکارڈ کی گئی ہے۔

ادھر روس کی جانب سے کہا گیا ہے کہ آئی ایس ایس تک سامان کی فراہمی کے لیے اگر ناسا نے درخواست کی تو روس اس سے تعاون کرے گا۔

آربیٹل سائنسز کی جانب سےکہا گیا ہے کہ فی الحال اس حادثے کی وجوہات سامنے نہیں آئیں ہیں اور اس سلسلے میں تحقیقات کی جا رہی ہیں۔ کمپنی کے مطابق معاملہ روانگی کے دس سے بارہ سیکنڈز میں ہاتھ سے نکل گیا اور بیس سیکنڈ کے اندر اندر یہ راکٹ تباہ ہو گیا۔ یہ بات اہم ہے کہ اس راکٹ کو پیر کی شام روانہ کیا جانا تھا، تاہم قریبی سمندر میں ایک کشتی کی موجودگی کی وجہ سے اس کی روانگی مؤخر کی گئی تھی، کیوں کہ یہ کشتی راکٹ کے ’ڈینجر زون‘ یا ’خطرے والے علاقے‘ میں موجود تھی۔