جاپانی شاہی تخت کے واحد ممکنہ وارث کی اٹھارہویں سالگرہ

جاپان کے شاہی خاندان کی طویل عرصے تک بقا کے لیے واحد امید سمجھے جانے والے شہزادہ ہیساہیٹو آج چھ ستمبر بروز جمعہ اٹھارہ برس کے ہو گئے۔ شہزادے کو شاہی خاندان کی بقا کی ذمہ داری اس وقت تک تن تنہا اٹھانا ہو گی، جب تک کہ  شاہی خاندان کی خواتین کو جانشینی کی اجازت دینے کے لیے ملکی قوانین میں تبدیلی نہیں کی جاتی۔

جاپان کے شاہی خاندان کی ایجنسی کے مطابق ہیساہیٹو کے بلوغت کی عمر کو پہنچنے سے متعلق  تقریب کو فی الحال آئندہ برس یعنی 2025 تک ملتوی کر دیا گیا ہے تاکہ پہلے وہ اسکول ختم کر سکیں۔ اس ایجنسی کی جانب سے شہزادے کی جنگل میں ٹہلتے ہوئے ایک ویڈیو جاری کی گئی ہے، جس میں کہا گیا کہ وہ نیچرل ہسٹری میں ''انتہائی دلچسپی‘‘ رکھتے ہیں۔

شہزادے کا حوالہ دیتے ہوئے کہا گیا ہے کہ انہیں ''امید ہے کہ ہر تجربے کے ذریعے مزید سیکھا، اس کے مختلف پہلوؤں کو جذب کیا اور ان کے ذریعے آگے بڑھا جا سکتا ہے۔‘‘ ہیسا ہیٹو ولی عہد شہزادہ آکیشینو اور ان کی اہلیہ شہزادی کیکو کے اکلوتے بیٹے ہیں اور وہ اپنے چچا اور موجودہ شہنشاہ ناروہیٹو کے بعد تخت نشینی کے لیے قطار میں دوسرے نمبر پر ہیں۔ ناروہیٹو کی ایک بیٹی ایکو بھی ہیں لیکن وہ  1947 میں متعارف کرائے گئے شاہی قوانین کے تحت اپنے عورت ہونے کی وجہ سے اپنے والد کی جگہ نہیں لے سکتیں۔

انہی قوانین کے تحت شاہی خاندان کی خواتین اگر کسی عام آدمی سے شادی کر لیں تو انہیں شاہی خاندان بھی چھوڑنا پڑتا ہے۔ اسی سبب ہیساہیٹوکی بہن اور سابقہ شہزادی ماکو نے 2021 میں، جب اپنے یونیورسٹی کے دوست سے شادی کی تو انہیں شاہی خاندان کو خیر باد کہنا پڑا تھا۔

مگر یہی قاعدہ شاہی خاندان کے مرد ارکان پر لاگو نہیں ہوتا۔ اس کی مثال یہ کہ موجودہ بادشاہ ناروہیٹو کے والد اور اس وقت 90 سالہ آکی ہیٹو نے اس وقت 89 سالہ مشیکو سے شادی کی تھی، جو آٹے کا کاروبار کرنے والے ایک تاجر کی بیٹی تھیں اور ان کی آکی ہیٹو سے ملاقات  1959ء میں ایک ٹینس کورٹ میں ہوئی تھی۔

جاپان کے شاہی خاندان  کی تاریخ 2,600 سال پر محیط بتائی جاتی ہے، دوسری عالمی جنگ میں جاپان کی اتحادی ممالک کے ہاتھوں شکست کے بعد شاہی خاندان نے باضابطہ طور پر اپنی مقدس حیثیت کو ترک کر دیا تھا اور پھر اس کے پاس کوئی سیاسی طاقت بھی نہیں رہی تھی۔

طویل العمری اور خرابی صحت کی وجہ سے 2019 میں استعفیٰ دینے والے بادشاہ آکی ہیٹو کو جاپان میں بادشاہت میں  جدت لانے والا شاہی حکمران سمجھا جاتا ہے۔ امپیریل ہاؤس ہولڈ ایجنسی نے اپریل میں اپنا پہلا انسٹاگرام اکاؤنٹ کھولا تھا اور اس میں بہت سی تصاویر میں صرف موجودہ شہنشاہ، ان کی اہلیہ اور بیٹی کی سرگرمیاں دکھائی گئی ہیں۔

رواں برس مئی میں جاپانی قانون سازوں نے شاہی جانشینی کے سخت قوانین میں ممکنہ نرمی پر بحث شروع کی تھی۔ جاپانی نیوز ایجنسی  کیوڈوکے ایک حالیہ سروے کے مطابق ملک کے 90 فیصد عوام شاہی خاندان کی خواتین کو اصولاﹰ تخت نشینی کا حق دیے جانے کے حامی ہیں۔

دوسری طرف شاہی خاندان کی ایک پدرسری جاپانی خاندان کی بہترین مثال کے طور پر تعظیم کرنے والے قدامت پسند ارکان پارلیمان اس ممکنہ قانونی ترمیم کے خلاف ہیں۔ اسی لیے جاپان میں یہ تبدیلی جلد آتی نظر نہیں آتی۔

شہزادہ ہیساہیٹو اور ان کے والد کے علاوہ کرسینتھیمم (پھولدار پودوں کی ایک قسم) کہلائے جانے والے جاپانی شاہی خاندان میں تخت کے ایک اور ممکنہ وارث موجودہ شہنشاہ کے بے اولاد چچا شہزادہ ہٹاچی بھی ہیں۔

ش ر⁄ م م (اے ایف پی)