ایرانی جوہری تنازعے پر بات چیت شد و مد سے جاری

خبر رساں ادارے اے ایف پی کے مطابق ایک ایسے موقع پر کہ جب اس سلسلے میں کسی حتمی معاہدے تک پہنچنے کے لیے طے کردہ ڈیڈلائن سر پر آ رہی ہیں، فریقین کے درمیان متعدد موضوعات پر شدید اختلافات موجود ہیں اور جان کیری کی کوشش ہے کہ کسی طرح ان اختلافات کو کم سے کم کیا جا سکے۔

جان کیری کو جمعے کے روز ویانا سے پیرس جب کہ ایرانی وزیرخارجہ جواد ظریف کو واپس تہران پہنچنا تھا، تاہم دونوں رہنماؤں نے ویانا میں اپنے قیام کو طوالت دے دی ہے۔ امریکی محکمہ خارجہ کی جانب سے کہا گیا ہے، ’کیری نے پیرس کے لیے اپنی روانگی مؤخر کر دی ہے تاکہ جواد ظریف کے ساتھ جاری مذاکرات کو آگے بڑھایا جا سکے۔‘

اے ایف پی کے مطابق دونوں رہنماؤں کے درمیان جمعے کے روز دو گھنٹے تک ون ٹو ون ملاقات بھی جاری رہی۔

امریکی محکمہ خارجہ کا کہنا ہے کہ فی الحال یہ معلوم نہیں کہ کیری ویانا میں کتنی دیر قیام کریں گے، تاہم وہ جمعے اور ہفتے کی درمیانی شب ہرحال میں ویانا ہی میں رکیں گے۔

اس سے قبل جب جواد ظریف کے تہران واپس جانے اور وہاں اعلیٰ ایرانی قیادت سے مشاورت کرنے کی خبریں سامنے آئیں تو یہ کہا جا رہا تھا کہ غالباﹰ ایران اور عالمی طاقتوں کے درمیان جاری ان مذاکرات میں قدرے پیش رفت ہوئی ہے، تاہم ایرانی وزیرخارجہ نے جمعے کی شام اپنے بیان میں کہا کہ عالمی طاقتوں کی جانب سے ایسی کوئی پیش کش نہیں کی گئی، جسے ساتھ لے کر تہران پہنچا جا سکے۔

واضح رہے کہ ایران حکومت اور اقوام متحدہ کی سلامتی کونسل کے پانچ مستقل رکن ممالک امریکا، روس، برطانیہ، فرانس اور چین پلس جرمنی ایرانی جوہری پروگرام سے متعلق کسی حتمی ڈیل تک پہنچنے کے لیے مذاکرات جاری رکھے ہوئے ہیں۔ گزشتہ برس کے اختتام پر فریقین کے درمیان ایک عبوری معاہدہ طے پایا تھا، جب کہ کسی حتمی معاہدے کے لیے 20 جولائی کی ڈیڈ لائن رکھی گئی تھی، تاہم فریقین کے درمیان متعدد امور پر شدید اختلافات کی وجہ سے اس ڈیڈ لائن میں توسیع کرنا پڑی۔

مغربی ممالک کو خدشات ہیں کہ ایران جوہری ہتھیاروں کی تیاری میں مصروف ہے تاہم ایرانی حکومت اپنے جوہری پروگرام کو پرامن قرار دیتی ہے۔