انگلینڈ نے بنگلہ دیش کے خلاف وائٹ واش مکمل کیا
5 مارچ 2010سیریز کے پہلے میچ میں انگلش کپتان کوک اور تجربہ کار کولنگ وُڈ نے اپنی ٹیم کو جیت دلانے میں کلیدی کردار ادا کیا، دوسرے میچ میں اوئن مارگن نے ’میچ وننگ‘ سنچری بنائی اور تیسرے میچ میں نوجوان افتتاحی بیٹسمین کریگ کیس ویٹر نے سنچری سکور کرکے ٹیم کو فتح سے ہمکنار کرنے میں اہم رول نبھایا۔ یہ بائیس سالہ انگلش اوپنر اپنے کیریئر کا تیسرا میچ کھیل رہا تھا۔
انگلینڈ نے چٹاگانگ میں کھیلے گئے اس میچ میں پہلے بیٹنگ کی اور مقررہ پچاس اوورز میں پانچ وکٹوں کے نقصان پر 284 رنز بنائے۔ کپتان کوک، کولنگ وُڈ، مارگن اور لیوک رائٹ نے بالترتیب 32، 36، 36 اور 32 رنز بنائے۔ بنگلہ دیشی سپن بولر عبدالرزاق نے چالیس رنز کے عوض دو وکٹیں حاصل کیں۔
جواب میں میزبان ٹیم بنگلہ دیش نو کھلاڑیوں کے نقصان پر 239 رنز ہی بنا سکی۔ بنگلہ دیش ٹیم کی طرف سے آفتاب احمد نے 46، مشفق الرحیم نے 40 جبکہ کپتان ثاقب الحسن نے 38 رنز سکور کئے۔ اس میچ میں انگلینڈ کی طرف سے 107رنز کی اننگز کھیلنے والے کریگ کیس ویٹر مین آف دی میچ جبکہ اوئن مارگن مین آف دی سیریز قرار پائے۔
یہ سیریز کئی لحاظ سے انگلینڈ کے لئے اچھی رہی کیونکہ دو مرتبہ نوجوان کھلاڑی ٹیم کو مشکل حالات سے نکال کر بہتری کی طرف لے گئے۔ سٹار بلے باز کیوین پیٹرسن پوری سیریز میں خاطر خواہ کارکردگی کا مظاہرہ کرنے میں ناکام رہے۔
رپورٹ: گوہر نذیر گیلانی
ادارت: شادی خان سیف